Tanzania yangu na ELIMU YA UKARABATI

Unapojitahidi kutumia mfumo wa fulani katika kujifunza jambo fulani, basi ni vema ukajiandaa kupambana naye katika SOKO LA KAZI. Na pia ukitegemea yeye akufundishe kila kitu ili uje tishio la soko lake la kazi, kuna uwezekano wa kutoiona siku hiyo ikifika. Lakini tatizo ni kwamba wenbye mamlaka hawalioni ama hawatilii mkazo hili. Na limekuwa likisemwa saana na wengi wenye kuliona. Sijui kama kuna mwenye "blog ya akili" ambaye hajaandika kuhusu elimu yetu, mfumo wake, utolewaji wake, uwezeshwaji wake, ufanisi wake na hata umuhimu wake kwa "watahiniwa."
Binafsi nimepitia elimu ya ufundi kutoka Chuo Cha Ufundi Stadi kilicho chini ya VETA kilichopo Dodoma ambapo nilisomea ufundi wa kukarabati mitambo na kutengeneza vipuri (spare parts) mbalimbali. Na bado naendelea na kazi iliyo katika fani hiyo hiyo. Lakini tofauti kubwa niliyoiona ni kuwa mafunzo na vitendea kazi tutumiavyo (ambavyo kwa bahati mbaya ndivyo vitumikavyo mpaka sasa) haviendani na ukuaji wa teknolojia ya kisasa. Mashine tutumiazo zinatumika zaidi katika kufanya ukarabati na si uzalishaji. Na bado najiuliza kuwa ni wapi tunapotaka "wataalamu" wetu waende kufanya kazi? Ni kweli kuwa twategemea kuwafunza teknolojia ambayo itawafanya (kama watapata ajira) wawe wakarabati? Sina hakika kwenye fani nyingine kama utabibu na kwingine wanavyoweza kuoanisha elimu yao na wale washindanao nao. Lakini kwangu nimekutana na haya.....
Lathe Machine nilizojifunza ni hizi Zitumikazo kwa uzalishaji wa kisasa ni hizi

Milling Machines nilizofunzwa ni hizi

Zitumikazo kwa uzalishaji wa kisasa ni hizi

Ukweli ni kuwa unapokutana nazo kwa mara ya kwanza unajihisi kuwekwa kwingine, ulimwengu mwingine na kwa hakika uzalishaji wake ni wa haraka na ulio na makosa kidogo sana.

Lakini kwangu swali ni kuwa kwanini wahusika hawaangalii mahitaji ya ushindani wa kazi na kuwekeza katika masomo yaendanayo na mahitaji hayo?