Tanzania Yangu.. Yenye vyombo vingi vya habari visivyo na habari zaidi ya taarifa

Ni kweli kuwa na mimi nilikuwa mmoja wao. Najua nitarejea habarini kwani nilikuwa na bado nawapenda na ndio sababu nasema

Tanzania ni moja kati ya nchi zinazosemekana kuwa na vyombo vingi vya habari hasa katika ukanda wetu. Lakini hivyo vyombo vyetu vya habari vinakera na kuchosha kwani asilimia kubwa wanaripoti na wachache saaana huchambua. Ni kama vile vyombo vya habari nchini mwetu (zaidi Redio na Televisheni) havina kazi zaidi ya kukusanya taarifa mbalimbali na kuziwakilisha bila kuzichambua. Yaonesha kinachojaliwa zaidi ni uhakiki wa chanzo kilichosema habari hiyo na si uhakiki wa kile kilichosemwa. Yaani ukiskiliza Taarifa za Habari na hata vipindi kama Matukio, Majira na vingine, kinachofanyika ni ripoti ya nani kasema nini, ili kitendeke lini, lakini si kuangalia uhakiki wa takwimu za kilichosemwa, si uhakiki wa undani wa tatizo linalozungumziwa na si uhakiki wa uwezekano wa kupata suluhisho ama mafanikio kupitia kile kilichosemwa.

Tanzania tuna wataalamu wengi ambao tungeweza kuwahusisha. Tuna wachambuzi wa elimu mbalimbali ambao wangeweza kuweka mgongano wa mawazo (debate) endelevu katika hoja na taarifa zinazotolewa viongozi mbalimbali lakini wengi hawawatumii. Kuna wanasiasa wa pande mbalimbali ambao wangeweza kuchangia kiuendelevu katika kuzichambua hoja na masuluhisho mbalimbali zitolewazo na viongozi mbalimbali katika serikali na pengine kuangalia uwiano wa manufaa kati ya kisemwacho na serikali na kiwazwacho na wananchi. Labda UKWELI, lakini UHAKIKA???? ............Yaani TRUTH lakini sio FACT

Cha kusikitisha zaidi ni hata Redio inayomilikiwa na Shirika la Utangazaji Tanzania (TBC) inaendesha vipindi vilivyojaa kauli kama "akiongea na TBC", "kwa mujibu wa ....", "katika taarifa iliyotolewa na ..." ama "akizungumza na waandishi wa habari" ilhali wanajua kuwa wao (TBC) ndio chombo cha wananchi (kama kweli wananchi ndio wenye serikali) na wanastahili kuwaelimisha na kuwapa wananchi HABARI ZILIZO SAHIHI, ZA KWELI, ZILIZO NA UKINZANI SAHIHI KWA KUANGALIA PANDE ZOTE NA KUZICHAMBUA KWA KUSHIRIKIANA NA WATAALAMU. Kama unataka kupata sehemu ya hizo "habari nyepesi nyepesi" zilizostahili kuchimbwa zaidi lakini hazijafanyiwa hivyo, sikiliza mifano iliyopo kwa kuBOFYA HAPA katika vipindi vyao vya HARAKATI na MCHANA HUU.

TBC wana uwezo na inastahili kuwakusanya watu walio na uwezo wa kuchambua hotuba mbalimbali (kama wahadhiri wa masuala ya Uchumi, Siasa, Siasa za kimataifa, wataalamu wa kilimo, wataalamu wa biashara na wengine) na kisha kuzipitia kwa umakini hotuba na taarifa kila zitolewapo. Ndivyo wafanyavyo wahabarishaji makini niwaonao katika ulimwengu wa sasa na ni kwa hakika TBC wangefungua njia hiyo, basi hata redio na Televisheni nyingine zingefanya hivyo.
Ninafurahi kila nipatapo nafasi ya kuangalia Jenerali on Monday kwani anaonesha ufahamu wa hali ya juu katika kuhoji na kuchambua mambo mbalimbali na hasa linapokuja suala la siasa na siasa za kimataifa. Ni kwa kuwa ana ufahamu na ana upeo na pia anaalika wageni walio na uwezo wa kuelewesha mengi. Nakumbuka nilivyokuwa napenda kipindi cha "THE HEAT" cha Redio One kilipokuwa chini ya Dj JD na Sos B ambapo walihoji na kuuzungumzia muziki kwa undani kwa kuwa wote walikuwa kwenye tasnia hiyo na wanaijua vilivyo.
Waandishi (ama niseme wakusanya taarifa) wanang'ang'ania Idara ya Habari Melezo, kwenye ofisi za viongozi, kwenye "taarifa kwa vyombo vya habari" na viwanjani na pengine wanaripoti kile ambacho takribani watu wote wamekisikia ama kukiona (kama matukio ya michezo na sherehe zitangazwazo moja kwa moja) na hata hawatumii wataalamu kama makocha ama wakufunzi ama maafisa wa jeshi wastaafu ama wataalamu wa masuala ya ujasusi ama wanasheria kufafanua kinachoendelea michezoni, ama katika maonesho ya kielimu / kiteknolojia, ama kwenye maonesho ya kijeshi ama kwenye kesi na matokeo yake wananchi wanshindwa kuelewa kinachoendelea. Ndio maana kwenye kesi kama ya kina Zombe, wananchi wanaendelea kuamini kuwa wameachiwa kwa sababu ya kufahamika ama rushwa ama vyopvyote na kushindwa kutambua ukweli wa namna ambavyo MAHAKAMA IMESHINDWA KUTHIBITISHIWA MAKOSA YA WATUHUMIWA.

Na ndio maana ni rahisi kuwa na "connection" unapomsikiliza Soggy Doggy akiendesha Uhuru Flava kwani anafanya apendacho na alicho na historia na ujuzi nacho kuliko kumsikiliza naniii anayefanya kile waitacho "hard news"

Lakini hii yaonekana kuwa kawaida kwenye vyombo vya habari. Hata walio na dhamana ya kuendeleza na ambao wanajua kila kitu kuhusu utaratibu huu na ambao wameufanya na kuufuata wakati fulani wa maisha yao ya kazi wanashindwa kuuhimiza ilhali tunajua ni muhimu kwa jamii.

Lakini hii ndio TANZANIA YANGU...ILIYO NA VYOMBO VINGI VYA HABARI VISIVYO NA HABARI ZAIDI YA TAARIFA

Mungu Ibariki Tanzania

Tanzania Yangu ni kipengele kinachozungumzia ytale yaendeleayo nchini Tanzania na namna ambavyo "ndivyo sivyo" inavyozidi kupamba moto nchini. Kwa matoleo yaliyotangulia BOFYA HAPA

Tuonane "Next Ijayo"