Ni wapi ulipo mstari kati ya kujivunia na kujivuna?

Mwandishi mahiri Anna Quindlen aliwahi kusema kuwa "If your success is not on your own terms, if it looks good to the world but does not feel good in your heart, it is not success at all."
Hakuna anayebisha ukweli kuwa mtu ajivunaye hukera wengi. Lakini pia sidhani kama kuna anayebisha kuwa kila chema tufanyacho twapaswa kujivunia. Tunaweka malengo ya muda mrefu, tunahangaikia malengo hayo na hatimaye kufanikisha tutakacho (hata kama si sawa na jirani, classmate, roommate e.t.c). Wengine husema "kinywa huumba" nNa maana hapa ni kuwa kuna nguvu ya matendo katika kile unenacho. Mara nyingi kunena ni hatua ya pili baada ya kufikiri na kabla ya kutenda. Kwa maana hiyo kuna nguvu ya neno katika kutambua mustakabali wako. Hivyo basi kwa kila chema tufanyacho sio tu twatakiwa kumshukuru aliyetuwezesha, bali pia kujivunia hatua tupigayo. Sasa hapa kwenye kujivunia mafanikio yetu ndiko kuliko na utata.
Ninaye rafiki yangu mpenzi, na kila ninapozungumza naye huniambia hapatikani kwa kuwa yuko "bize na kabiashara" kake. Mwanzo sikuwa nakereka maana sikujua ukubwa wa biashara, lakini inavyoonesha ni kuwa inakuwa, na licha ya matatizo na makwazo ya kiuchumi, bado anaendelea kusonga na biashara yake. Kichwani mwangu nikajiuliza, Ni kweli hataki kusema BIASHARA ili asionekane anajikweza? Lakini pia nikagundua kuwa si yeye pekee. Wengi wetu ndivyo tulivyo. Ukimwambia "nyumba yako nzuri na imependeza" anakujibu "Asante, najitahidi kukapendezesha kakibanda kangu" KIBANDA???? Na wakati mwingine unakuta ndiyo nyumba aliyokuwa akiiota na ameifanyia kazi miaka nenda rudi kuifanikisha. LAKINI BADO HATAKI KUJIVUNIA HATUA ALIYOFIKIA.
Kinachoogopwa hapa ni kulinganishwa, ni kuonekana unajiona bora na kuishi kwa hofu ya "tafsiri" ya wengine kuhusu mafanikio yako.
Kwangu mimi mafanikio ya mtu ni kulingana na alikotoka, aliko, vitendea kazi alivyokuwa navyo, alivyotumia rasilimali na muda na mambo mengine kama maamuzi aliyofanya kufikia alipo. Ni lazima kuanza kujivunia mafanikio yetu badala ya kusubiri tukifa ndio tusifiwe. Natamani rafiki yangu angeacha kuniambia "kabiashara" (kama ambavyo nimemuomba aache) na pia natamani kama wengi wa wanadamu wangeweza kutambua umuhimu na thamani wa kila wanachohangaikia kabla hawajakipoteza.
Peter tosh aliimba kuwa "you never miss your water, till your well runs dry" Tusisubiri kupoteza tulivyonavyo na kutumia historia kujivunia juhudi zetu. Tufanye sasa, ila tusidanganye kwa kujikweza ili tuonekane mashujaa maana kwa kufanya hivyo tutakuwa tunajivuna badala ya kujivunia.

KWANGU MIMI HUU NDIO MSTARI KATI YA KUJIVUNIA NA KUJIVUNA

Luciano aliimba kuwa
"Satisfy yourself, dont deny yourself, be alright with yourself and you'll survive. Always love yourself, do the same to someone else, always be true to your self....." Msikilize

Jumanne njema