Kuna wewe wangapi ndani ya wewe?

Picha kutoka http://www.designyourway.net
Labda wengine watasema mmoja. Lakini si kweli. Nijuavyo mimi ni kuwa kuna takribani wewe wanne ndani yako ambao kwa nyakati tofauti hukufanya uwe unavyokuwa mbele ya watu fulani kuhusu jambo fulani kwa wakati fulani ili kitokee kitu fulani.
Ni "wewe" hao wanne ambao wanastahili kushirikiana vema na wangu wanne ina wa yule ili kuweza kuifanya dunia hii kuwa mahala pema pa kuishi.

Labda tuanze kwa kuwaangalia hao kina wewe wanne waliomo ndani mwako.
1: Wa kwanza ni yule ambaye kwa wakati ama tukio ama swali ama mahala ama kazi ama kitokeacho mbele yako anakuwa ANAJUA, NA ANAJUA KUWA ANAJUA. Huyu ni yule wewe anayekuanya uonekane "una akili" na mwenye suluhisho kwa lile uulizwalo. Lakini wewe huyu ndiye aliye chanzo cha dharau kwa wengi akiamini kuwa ana uwezo kuliko wengine ambao wako katika aina nyingine ya u-wao.

2: Kuna yule wewe ambaye ANAJUA LAKINI HAJUI KUWA ANAJUA. Mara nyingi huyu ni yule wewe wa kujilaumu ambaye kila linapotokea jambo anaishia kusema "nilijua itakuwa hivi" ama "sijui kwanini sikujibu hivi maana nilijua ndio jibu" na kauli nyingine nyingi kuonesha kuwa alikuwa amekaribia kuwa sahihi japo hajawa sahihi. Huyu ni wewe wa "nge" ambaye sentensi zake mara nyingi ni kama vile ningefanya. ningewahi, ningeamua, ningejaza n.k

3: Wewe wa tatu ni yule ambaye HAJUI NA ANAJUA KUWA HAJUI na huyu ni kati ya walio wakarimu saana. Wewe huyu ni yule ambaye ukiulizwa unakuwa na uwezo ama ujasiri wa kusema "kwa kweli sijui ila muulize..... anajua". Huyu huwa hana majivuno na ni mtu wa majibu mafupi na muhimu. Pengine anakuwa wa "kujivunga" pale anapoamua kutokuwa wazi kuwa hajui japo anajua pa kupata suluhisho.

4: Na wewe wa nne (ambaye si wa kuwa naye sana) ni yule ambaye HAJUI NA HAJUI KUWA HAJUI. Yaani huyu ni wewe wa ajabu sana. Mwenye akili ambazo mara nyingi huja kuthibitika kutokuwa murua kwa wakati wa uwepo wake. Ambaye anaweza kubisha ukweli asijue kuwa ndio ukweli na baadae kuishia kuumbuka.


Lakini kama nilivyosema awali. Kila mtu anao hawa watu wanne ndani ya u-moja anaoamini kuwa nao na ni kwa sababu huwezi kuwa katika u-wewe wa aina zaidi ya moja kwa wakati mmoja. Na japo waweza kubadilika kutoka mmoja kwenda mwingine kwa wakati mfupi na bila wewe kujijua, lakini sote twapitia u-sisi huu na kwa nyakati tofauti twaweza kukumbuka kufanya kati ya hayo yaliyoandikwa hapo juu. Na wakati mwingine si kusema tu, bali hata kuwaza. Yaani kuwaza kuwa kitu fulani kitakuwa hivi na baadae kikawa hivyo, ama kisiwe hivyo ama kufikia wakati ukarejea mawazo yako na kusema "sikuwa sahihi"
Labda jiulize kuwa sasa hivi uko kwenye u-wewe gani maana hilo pia litaathiri namna utakavyoelewa usomacho hapa
Tuonane "NEXT IJAYO"