TANZANIA YANGU....Na DHIHAKA ya kuwaenzi MASHUJAA

NB: MARUDIO YA MWAKA JANA...... Ni wakati ambao tunatakiwa kuhakikisha kuwa HATUENZI MASHUJAA KWA STAILI AMBAYO TUMEIIGA KUTOKA KWA WALE AMBAO "MASHUJAA" WETU WALIPIGANA NAO KUWAONDOA NCHINI.
Mimi namuangalia(ga) tuuu.....
Mhe. Rais. Ni lini mara ya mwisho ulitoa hotuba yenye kuwataja mashujaa utakaowataja leo? Siku ya mashujaa mwaka jana eeeeeee? Ok!
Leo (Julai 25, 2011) ni SIKU YA MASHUJAA NCHINI TANZANIA.
Siku hii INAKUMBUKWA kuliko KUENZIwa, jambo ambalo si geni kwa TANZANIA YANGU, kwani hata siku ya uhuru ni vivyo hivyo. Niliandika HAPA, kwamba naiona kama SIKU YA UHURU INAYOSHEREHEKWA KWA STYLE YA KI-TUMWA. Na nina sababu kadhaa za kuona kuwa namna tunavyosherehekea siku hii (ambayo tunastahili kuiadhimisha) ni DHIHAKA KWA MASHUJAA WA KWELI.
Kwanza ninawaza kuhusu TAFSIRI YA SHUJAA WA TANZANIA.
Ni nani?
Aliishi lini (kama haishi sasa)?
Alitengenezwa ama anatengenezwa vipi?
Kituo cha Televisheni cha History channel wana kauli mbiu isemayo "HISTORY. MADE EVERYDAY". Ninalowaza ni namna ambavyo tunasherehekea siku ya mashujaa ilhali hatuna mashujaa wajao.
Kwenye picha hapo juu wamuona Rais Kikwete katika moja ya "sherehe" nyingi za mashujaa nchini ambazo amehudhuria na kufanya kile ambacho anastahili kufanya, na kisha kuondoka.
KWANI SHUJAA WA LEO HII NI NANI?
Je ni mwalimu kama Mwalimu huyu Leziel Gowele ambaye alikuwa mwalimu pekee katika shule ya sekondari ya Makonde wilaya ya Ludewa mkoani Iringa?
Je, ni dada zetu wanaolea watoto watukutu wa VIONGOZI wetu? Ambao HAWANA MIKATABA YA KAZI, wananyanyaswa, wanabakwa, wanapuuzwa, mishahara midogo na kazi nyingi. Ambao wamelea wengi wa VIONGOZI WETU wa sasa na bado wanaendelea kutothaminiwa na kuitwa ma-house girl? Kama huelewi karaha za maisha yao, TAZAMA VIDEO HII hapa chini Ama ni askari wetu ambao asilimia kubwa wanaishi katika mazingira yasiyostahili na kila uchao wanaenda kuwalinda WATAWALA wanaoishi "PEPO YA DUNIANI"? Hivi mazingira haya hapa chini yangestahili kuwa katika nyumba za askari polisi, tena kituo cha kati JIJINI DAR-ES-SALAAM?
Labda kuna atakayesema kuwa ni kina Mkwawa, Mirambo, Kinjekitile na wengine wanaoeziwa kwa kumbukumbu ambazo baadhi zina hadhi ya chini na siamini kama kuna watu wengi wanaopata nafasi ya kusimama na kuangalia, kusoma na kuenzi kilichoandikwa. Zaidi ni kwa matumizi ya maelekezo ya kufika mahala fulani ama kukutana mahala fulani.
Iringa
Mbeya
Morogoro
Hawa wote walipigania mambo ambayo leo hii bado yapo na sasa yanatendwa na waTanzania wenzetu. Nina hisia kuwa WAKIFUFUKA, TANZANIA ITAINGIA KATIKA VITA NINAVYOAMINI WATAANZISHA KUMNG'OA MKOLONI MZAWA.
Hivi ni kipi ambacho serikali ya Rais Kikwete itaenda kusema kuwa INAENDELEZA KWA VITENDO katika kuwaenzi mashujaa hawa?
Mbona hatuoni MITAALA YENYE HABARI KAMILI NA ZA KUVUTIA kuhusu MASHUJAA WETU?
Kwanini pesa za GWARIDE, ULINZI, SARE ZA WANAJESHI na "CHA-JUU" zisiwekezwe kwenye kuJENGA MAKUMBUSHO YA KILA SHUJAA huko kwao, kuhakikisha kuna historia ya kutosha katika vitabu na mitandao na kuweka mkakati wa kuhakikisha kila mwanafunzi anasoma kuhusu mashujaa hawa?
Ni kwanini Rais asisitishe gharama za gwaride na hotuba (ambayo anaweza kuitoa kupitia redio na televisheni) na kuhamishia pesa hizo katika harakati za kuwaajiri walimu, kuwajengea nyumba nzuri, kuboresha maisha ya kinamama (ambao nao ni mashujaa kwa kuwa wengi wao hubeba mzigo wa kulea familia), kuboresha maisha ya askari na makazi yao, kujali wafanyakazi wastaafu (na sio mambo ya EAC) na mengine mengi?
Nina wasiwasi kama Rais alishatoa hotuba yoyote inayohusisha yeyote atakayemtaja leo baada ya SHEREHE ZA MASHUJAA MWAKA ULIOPITA.
Kwa ujumla, mfumo wa kusherehekea mashujaa nchini Tanzania ni DHIHAKA.
Na kama unyonyaji unaendelea, rushwa imeshamiri, kuna matabaka katika jamii, hakuna usawa, hakuna huduma muhimu kwa wananchi na mengine mengi, hawa viongozi wanapokwenda kwenye sherehe hizi wanakwenda kufanya nini? Kuwakebehi MASHUJAA kwa kuwa wanaendeleza yale waliyokuwa wakipinga?
Ni wakati wa kuanza kuifunza jamii kuENZI mashujaa wa ngazi zote. Wakati ambao mtoto hatagoma kumsikiliza shujaa (Mama yake) na kukimbilia kumuangalia rais anayekwenda kwenye makaburi ya mashujaa. Wakati ambao watoto hawatawadharau waalimu huku wakiwatukuza kina Mkwawa, Chief Rumanyika, Nyerere, Kawawa Kambona na wengineo.
Wakati ambao tunatakiwa kuhakikisha kuwa HATUENZI MASHUJAA KWA STAILI AMBAYO TUMEIIGA KUTOKA KWA WALE AMBAO MASHUJAA HAWA WALIPIGANA NAO KUWAONDOA NCHINI.
Lakini hii ndio nchi yangu
TANZANIA YANGU......YENYE KUSHEREHEKEA BADALA YA KU-ENZI MASHUJAA. Ni Dhihaka.

Nawaza kwa sauti tuuu!!!!! Na hivi ndivyo niliwazavyo TATIZO, na amini usiamini, labda NAMNA NIONAVYO TATIZO NDIO TATIZO

Tanzania Yangu ni kipengele kinachozungumzia yale yaendeleayo nchini Tanzania na namna ambavyo "ndivyo sivyo" inavyozidi kupamba moto nchini. Kwa matoleo yaliyotangulia BOFYA HAPA

Tuonane "Next Ijayo"