Mwaka unakatika....Tumesonga mbele ama nyuma???

 Amani, Heshima na Upendo kwa wana-blog wote.
Kwanza namshukuru MUNGU kwa baraka ya uhai ambayo mimi nawe tunayo mpaka sasa.
Pili nikupe pole kwa harakati za maisha ambazo sote twazipitia kufanikisha yale mema tupendayo. Ni harakati kubwa sana hasa katika kusonga na maisha yetu ya kila siku na pia kuendeleza gurudumu hili la blogs
Nimekuwa nikituma makala, vipindi na kazi zangu kwenu nanyi mmekuwa wakarimu sana kuzipokea. Ushirikiano ambao umenifanya nizidi kujivunia kuwa mmoja wa bloga
Lakini pia, najivunia sana kuwasiliana na kila mmoja wetu hivi sasa ili kuanzisha mjadala wa changamoto zilizo mbele yetu kama JAMII YA WANA-BLOG wenye lengo la kuigusa jamii.
Ningependa tuanze kwa kujiuliza, Je! Tunasonga mbele ama nyuma katika harakati zetu.
Nashukuru kwa blogs na tovuti mpya ambazo zinachipuka na kuendeleza nia njema ya kuigusa jamii. Kaka Luta Kamala aliwahi kuandika akijuliza KWANINI TUNA-BLOG? (Bofya hapa) na hata Kaka Chambi Chachage aliuliza kama uwepo wa blogu zetu unakuza ama kufifisha tasnia nzima ya uandishi (Ipitie hapa). 
Jibu halisi tunalo mioyoni mwetu kulingana na dhamira tulizonazo.
Lakini kwa ujumla, haijalishi ni sababu gani ilikufanya u-blog, mwisho wa safari sote tunajikuta na zao moja ama "mlaji" mmoja ambaye ni JAMII.
Bloga awekaye picha anataka kuionesha jamii alichokiona.
Bloga ahabarishaye anataka kuihabarisha jamii. Yule aandikaye Utambuzi anataka jamii ijitambue. Anayeweka kumbukumbu ni sababu anataka jamii ije isome baadaye. Atangazaye biashara anataka jamii ijue palipo na huduma ama biashara husika. Afunzaye mapishi, mitandao, mavazi, mitindo nk, woote wanalenga katika kuielimisha jamii.
Kwa maana nyingine sote twaiandikia JAMII.
Na hili ni lengo jema.
Lakini swali linarejea kuwa......
Mwaka huu ambao unaomalizika wiki hii unaonekana kuwa hatua gani kwetu?
Logo hapo juu inaonyesha hatua iliyopihgwa katika siku za mwisho za mwaka. Kuanzishwa kwa mtandao wa bloga ambao (ukitumiwa vema) utakuwa chachu ya mabadiliko ya nchi hasa kwa mwaka huu wa uchaguzi.
Ninalowaza ni hili.....
Vipi tunaweza kuweka nguvu na jitihada zetu pamoja kuweza kuitumikia vema na kwa ufasaha jamii yetu???
Mafanikio ya bloga mmoja mmoja yanaweza kudhihirisha kuwa TUNAWEZA, lakini tunalostahili kufanya sasa, ni kushirikiana na kuwa makini katika kila jema tutendalo.

Tunapoumaliza mwaka 2014, tuangalie nyuma na kujiuliza, mwaka unakatika....Tumesonga mbele ama nyuma??


Na jibu la swali hili, liwe CHANGAMOTO YETU sote

Baraka kwenu nyote

Heri ya Mwaka Mpya 2015

TAARIFA KUHUSU malalamiko ya MMK MEDIA kuhusu Afisa Ubalozi

Kwa wasomaji wote wa Changamoto yetu (na blog nyingine)

Nimeamshwa na taarifa juu ya malalamiko ya MMK MEDIA kwenye vyombo vya habari kuhusu ubalozi na / ama afisa balozi wake
Binafsi napenda kugusia mambo mawili kuhusiana na lalamiko lao KWA NAMNA AMBAVYO NIMEHUSISHWA / TUMEHUSISHWA (kama Jamii Production)
Katika malalamiko hayo, MMK MEDIA imeambatanisha BARUA YANGU ambayo ilikuwa ni BARUA BINAFSI KWA KAIMU BALOZI (kwa wakati huo) Mama Lilly Munanka.
Barua hiyo (kama nilivyosema hapo awali) ilikuwa ni BARUA BINAFSI na haikupaswa kuchapishwa kwenye blogu kama ilivyotokea. Niliiandika kwa Mama Munanka kama barua ya awali ya malalamiko kwake na haikuwa barua ya kuchapisha kwenye blogu kama ilivyotokea (kwa bahati mbaya) kwa wale niliowaambatanisha.
KAMA INGEKUWA NI YA KUCHAPISHWA KWENYE BLOGU, BASI INGEKUWA KWENYE BLOGU YANGU KABLA YA KWINGINE KOKOTE
Hata hivyo, punde baada ya kuchapishwa niliwasiliana na wanahabari wenzangu (ambao niliwaambatanisha katika barua hiyo) na kuwaeleza kuwa ile ilikuwa NAKALA KWAO NA SIO CHAPISHO LA BLOG.
Nilifanya hivyo kwa kuwa ilikuwa ni mara yangu ya kwanza kuwasiliana na Mama Munanka na hivyo halikuwa jambo sahihi kuchapisha barua hiyo bloguni.
Lakini pia, katika lalamiko la sasa, MMK MEDIA wameandika kuwa "Baada ya tukio hafla hiyo kubwa kupita bila kusita niliandika masikitiko yangu kwa niaba ya MMK MEDIA GROUP wamiliki wa Swahili TV online, Swahili Radio Online na Blog ya Swahilitv.blogspot.com kuhusiana na yaliyojitokeza ubalozini."
Ni kweli kuwa nami niliyaona malalamiko hayo ambayo pia kwa kiasi fulani yalinisikitisha
Katika malalamiko hayo, MMK MEDIA iliandika kuwa "afisa huyu alikimbia vyombo vya habari rasmi na kualika video production company inayofanya shughuli za harusi kuwa mwakilishi wa Swahili Tv, Swahili Radio, Swahilitv Blog, na vyombo vingine vinavyoheshimika hapa DMV" (tazama screenshot hapa chini)

 Licha ya kwamba post hii iliondolewa muda mfupi baadae, lakini bado UKWELI unabaki kuwa MMK MEDIA wameamini, na bado wanaamini (kwa kuwa mpaka sasa hawajakanusha) kuwa JAMII PRODUCTION SI CHOMBO CHA HABARI bali ni kampuni ya kurekodi harusi.
Hilo lilinisikitisha kwa kuwa NI DHAHIRI KUWA TUMEKUWA TUKIFANYA HABARI KABLA NA ZAIDI YA MMK MEDIA
Tumekuwa tukishirikiana HABARI (sio matukio na taswira tuu) na vyombo vingi vya habari nchini Tanzania KABLA YA KUZALIWA KWA MMK MEDIA.
Na katika hili, ushahidi upo wazi kwani sote tunaweka kazi zetu online, hivyo ni rahisi kwa wewe msomaji kuLINGANISHA UBORA WA HABARI katika KAZI ZETU ZA SAUTI (hapa) NA KAZI ZAO (hizi hapa) ama KAZI ZETU ZA VIDEO (hapa) na KAZI ZAO (hapa)

Kwa kumalizia tu, niseme kuwa SIPINGI HAKI YA MMK MEDIA KULALAMIKA, ila nasikitika kuwa WAMETUMIA BARUA YANGU BINAFSI KUJAZIA MALALAMIKO YAO HADHARANI, na pia wameshindwa kuwa wawazi kuhusu malalamiko yao ya awali ambayo kwa namna moja ama nyingine YALIPOTOSHA KUHUSU JAMII PRODUCTION NA KAZI ZAKE.
Lakini bado (BILA IDHINI) wametumia nakala ya barua yangu kutimiza lengo lao.

Katika hili nimesikitishwa na ningependa NILIWEKE HILO WAZI.

 Mubelwa T Bandio
MTAYARISHAJI / MTANGAZAJI
JAMII PRODUCTION

POWER BREAKFAST....Katika hili mmechemsha.

Najua litakalozungumzwa hapa SI JIPYA (kwa maana ya maudhui) lakini ninapenda tuliangalie katika mtazamo wa ki-fani zaidi.
Weka kando kilichozungumzwa katika AUDIO nitakayoweka hapa chini, tuwekeze katika NAMNA KILIVYOZUNGUMZWA.
Katika kipindi hiki (ambacho kimesambaa sana mtandaoni), Bwn. Ruge Mutahaba amefafanua mengi kuhusu kilichompeleka kwenye kipindi hicho.
NA AMEFANYA VEMA
Tatizo linakuja katika kuTAMBUA madhumuni ya kilichorushwa.
Sijasikia mahala popote wakiyataja kama MAHOJIANO (na sina hakika kama mazungumzo haya yana vigezo vya kuitwa hivyo) lakini pia sikusikia yakitajwa kama TAARIFA KWA VYOMBO VYA HABARI kwa kuwa pia nina wasiwasi kama yana-fit huko.
Iwapo yangekuwa mahojiano, ningetegemea watangazaji wa kipindi waliosikika kuwa "FAIR & BALANCED" katika maswali yao.
Lakini watangazaji wamesikika kama CHEERLEADERS katika mazungumzo haya "wakijazia" pale ambapo wanaamini "bosi" wao amekosea.
HILI LIMEONDOA SUALA ZIMA LA MAHOJIANO
Na ninapowaza kama nilichosikiliza ni TAARIFA KWA VYOMBO VYA HABARI, nawaza kuwa TAARIFA HII ILIKUWA IKITOLEWA NA WATU WANGAPI?
Ukweli ni kuwa watayarishaji na watangazaji wa kipindi cha POWER BREAKFAST wameshindwa kuweka uwiano katika kipindi na wamekuwa zaidi ya cheerleaders kwenye mazungumzo HAYA

Na huu ni mtazamo wangu kwa namna nionavyo tatizo....
Labda NAMNA NIONAVYO TATIZO NDIO TATIZO

Ya Ruge na Jay Dee.....Bongo Flava kama uSHOGA

ONYO....Habari ni zaidi ya kichwa chake. Japo lazima iendane nacho

Hivi karibuni kumetokea (kile kinachoonekana kama) ugomvi kati ya mmoja wa wadau wakubwa katika muziki wa kizazi kipya ambaye pia ni kiongozi mwandamizi wa Radio Clouds Bwn Ruge Mutahaba na nyota wa muziki nchini Bi Judith Wambura (Lady Jay Dee). 

Ugomvi ama kutoelewana huku kumekuwa dhahiri kwa jamii baada ya mfululizo wa matam,shi ya Lady Jay Dee kuhusu kituo cha Clouds na hata Bwn. Ruge na Bwn. Joseph Kusaga (mmiliki wa Clouds Media Group).
Na mambo yakazidi kuwa wazi zaidi baada ya Lady Jay Dee kuandika WOSIA WAKE iwapo atatangulia kabla ya Ruge na Kusaga (usome HAPA) Baada ya hapo, Bwn Ruge aliamua kuelezea suala hili pamoja na mengine mengi kwenye kipindi cha Power Breakfast ambacho kilirekodiwa na maelezo yake kuwekwa HAPA Pamoja na kusoma na kusikiliza pande zote za mgogoro huu ambao naamini haustahili kuwepo, bado naona KUNA JAMBO LA KUJIFUNZA.
Kuna ukweli juu ya kile kizungumzwacho na wote na kuna haja ya kuona WAHUSIKA WANASHUGHULIKIA HILI.
Kama alivyosema Bwn. Ruge, kuna haja ya wahusika kushughulikia yale yanayoendelea huko mitandaoni, na nakubaliana naye, kama ambavyo naona uhitaji wa mamlaka husika kufuatilia malalamiko ya Lady Jay Dee ambayo yamekuwepo kwa muda mrefu.
Ukweli ni kuwa MAMLAKA HUSIKA HAZIFANYI KAZI ZAKE. Kama nilivyopata kuandika mwaka jana kuhusu KISWAHILI KAMA USHOGA (rejea hapa), naona ndilo linaloendelea hapa, ambapo mmomonyoko wa maadili katika ngazi zote za biashara ya muziki nchini Tanzania unaachwa bila kushughulikiwa katika hatua hizi za awali mpaka pale watakapoanza kushikiana mtutu ndipo tujiulize wameanza lini?
Panafuka moshi hapa, na hakika KUNA MOTO CHINI ambao ni lazima tutambue kuwa tukiuacha unaweza kuendelea kuleta madhara.
CHANGAMOTO YETU ni.....
TUSIACHE HAYA YANAYOENDELEA KUFUKUTA YAFIKE MBALI ZAIDI kama tulivyofanya kwenye ushoga 
TUSIACHE mpaka wengine ambao hawajawa na dhamira halisi ya kujiunga na ugomvi huu wafanye hivyo (kama tulivyofanya kwenye ushoga)  
TUSIPUUZE KILIO CHA LADY JAY DEE WALA MAELEZO YA RUGE MUTAHABA.
Kuna ukweli katika yaliyosemwa na pande zote na hakuna haja ya kuacha hili nalo likafikia mahala ambapo walio nje watatulazimisha kulishughulikia.
Tumepuuza mengi na athari zake tumeziona.
KUNA LA KUJIFUNZA katika hili. Na wakati wa kulishughulikia ni sasa. Wote wanaohusika na hili wameonyesha nia ya kulishughulikia, kulimaliza na kuendelea na maisha yao kama kawaida.
Alipohojiwa HAPA na Kaka Sunday Shomari , Lady Jay Dee amenukuliwa akisema “Wasiponifuatilia ntanyamaza watakuwa marafiki zangu tutapatana” na wakati huohuo, Ruge amesema wakikubaliana, watatafuta sehemu "neutral" na kujadili hili.
NIA IPO, UWEZO UPO...SASA LILILOBAKI NI KUTEKELEZA kazi hiyo.
Tusiliache hili likafika lilipofika la ushoga kisha tukasema hatuna namna ya kufanya. TUNAYO SASA.

Na huu ni mtazamo wangu kwa namna nionavyo tatizo....
Labda NAMNA NIONAVYO TATIZO NDIO TATIZO

KUELEKEA KRISMAS.......Naitamani zamani

Labda ni akili zangu, lakini naona uwiano kati ya mazuri na mabaya ya kile kiitwacho maendeleo unaonekana kunufaisha zaidi upande wa mabaya.

Lakini "MAENDELEO" ya sasa ni yale ambayo watu wanafanya kile walicho na UHURU nacho, hata kama hakina manufaa kwao.
WanaIGA hata yasiyoigika kwao kwa kisingizio cha UHURU NA HAKI hata kama ni cha athari kwao.

Haya ni baadhi ya mambo yanayonifanya niuchukie U-SASA na ndio maana naitamani zamani.

NAITAMANI ZAMANI ambayo sherehe kama Krismas na Idd zilimaanisha uchaji wa kiroho zaidi na kukua kwa mauzo ya bidhaa ziendanazo na masuala ya kidini na sio kama ilivyo sasa ambapo sikukuu hizi ni "fashion-show" na ongezeko la mauzo ni kwenye nyama choma, chips, kondom na oda za vyumba kwenye guest houses.

NAITAMANI ZAMANI ambayo sio tu maisha yalikuwa na unafuu, lakini ambayo tulijawa IMANI baina yetu, UTU, MSHIKAMANO na hata UPENDO.

NAITAMANI ZAMANI ambayo familia zilijaliana na si kubaguana na kuchujana kama ilivyo sasa kwa vigezo kama kipato na muonekano wa wanafamilia.

NAITAMANI ZAMANI ambayo Baba yangu alienda kusomea ualimu kwa kuwa alikuwa na wito na sio sasa ambako wengi wanapelekwa kusomea ualimu kwa kuwa hawakufaulu vema. Zamani ambayo Mama yangu alienda kwenye uuguzi kwa kuwa ana wito na si kwa kuwa alitegemea kupata pesa nyingi ama kwa kuwa hakufanya vema shuleni. (Thanx to them. They're my Forever Heroes)

NAITAMANI ZAMANI ambayo TENDO LA NDOA lilikuwa na maana sawa na jina lake na si sasa ambako linatumika "KULAZIMISHA UHALALI WA NDOA" na kuonesha urijali na utendaji kazi wa "wapendanao" kama sio kuonesha "ustahimilizu" wa mikikimikiki baina ya wajinga katika jamii.

NAITAMANI ZAMANI ambayo watu walijisitiri sehemu za siri tu na hilo halikuwa tatizo walipoangaliana na hawakubakana na hakuna aliyetumia hicho kama kisingizio cha kuhalalisha tabia zao za UZINZI na UASHERATI tunayosikia watu wanasema kuwa inatokana na mavazi ya kinadada.

NAITAMANI ZAMANI ambayo teknolojia ilikuwa yenye nia ya kuboresha maisha na sio sasa ambayo yazidi kuwekeza katika saratani (cancer) zijazo. Kila kitu ni mionzi na kila muonzi una athari na tunasema "tunaendelea"

ZAMANI ambayo hatukuwa na njia nyingi za kurahisisha utendaji kazi na kutembeleana lakini tulipata muda mwingi wa kuonana na kujuliana hali na sio sasa ambako kila mtu yuko "busy".

NAITAMANI ZAMANI ambayo hatukuwa na madaktari wengi kulingana na idadi ya watu na hata madawa hayakuwa utitiri kama sasa lakini ulimwengu ulikuwa na afya njema kuliko ilivyo sasa.

NAITAMANI ZAMANI ambayo tulikuwa na silaha za kutulinda na hatari na si sasa ambako silaha ni matoleo ya kila mwaka kama magari na hazileti usalama zaidi ya ongezeko la hofu.

ZAMANI ambayo tulikuwa wazi "kudumisha fikra za Mwenyekiti" na sio sasa mabko mwenyekiti na watawala wenzake wanadumisha fikra zao kwa mgongo wetu.

NAITAMANI ZAMANI ambayo tulikuwa na "wataalamu" wachache waliojitahidi kila kukicha kujenga kilicho bora kwa nchi yetu na si sasa ambako utaalamu unaweza kupimwa kwa kuangalia ni kiasi gani umeweza kujinufaisha ndani ya muda mfupi uliokuwa kazini z9hasa serikalini). Yaani kuwa na wataalamu wengi ni kuongeza matatizo mengi

NAITAMANI ZAMANI ambayo watu walijitahidi kuongeza maisha katika miaka tuishiyo na si sasa ambako tunahangaika kila kukicha kuongeza miaka katika maisha mafupi tuishiyo.

NAITAMANI ZAMANI ambayo tuliona SIASA isiyo VISA NA MIKASA na ulafi, wizi, uchoyo na ujinga wa kunyonyana uliopo sasa.

ZAMANI ambayo tulikuwa na warembo halisi weeengi japo hatukuwa na mashindano utitiri ya urembo.

NAITAMANI ZAMANI ambayo ukikutana na binti mrembo ungesema umekutana na mtu na sio sasa kukutana na plastiki zilizobandikwa nyusoni mwa watu kwa gharama za juu kuwafanya wawe wanavyodhani wanaweza kuwa.

NAITAMANI ZAMANI ambayo tulikuwa na vyakula vichache vyenye uchunguzi mdogo wa kujua nini kilichomo ndani mwake lakini tukawa na lishe bora na si sasa ambapo tuna vyakula vingi vyenye maelezo mengi na afya ni mbovu kuliko maelezo.

NAITAMANI ZAMANI ambayo watu walijua kuwa kuna maendeleo yetu na "wao" wana maendeleo yao na sio sasa ambako kila chao ni chema na ni maendeleo na kilicho chetu ni cha kupuuzwa.

NAITAMANI ZAMANI ambayo kama ungepata ajali ungesafishwa kidonda na msamaria na si sasa ambako watakimbilia kusafisha mifuko na pochi.

Yaani naitamani zamani japo najua kuwa zamani hiyo mimi na wewe tusingeweza kuwasiliana tuwasilianavyo sasa, japo tungeweza kusakana na kuongea haya badala ya kupitishiana hapa changamotoni.

Naitamani zamani jamaniiiiiiiiiiiiiiiiiii!!!!!!!!!!!!!!!!!!

Tuonane Next Ijayo

Ya Rais Kikwete na Ray C.....TULENGE SHABAHA

Wiki hii, moja ya habari njema zilizoihusu fani ya muziki Tanzania ni ile iliyohusu "kupona" kwa msanii aliyepata umaarufu sana ukanda wa Afrika Mashariki Bi Rehema Chalamila anayejulikana zaidi kama Ray C.
Rehema ambaye alikuwa ameathirika kwa madawa ya kulevya amenukuliwa kuwa alikwenda IKULU kumshukuru Rais Kikwete "kwa msaada wa matibabu wakati alipokuwa mgonjwa hivi karibuni.
Rehema aliyefuatana na Mama yake Mzazi Margareth Mtweve na Dada yake Sarah Mtweve alimweleza Rais kuwa afya yake imeimarika na kwamba muda si mrefu atarejea jukwaani kukonga nyoyo za mashabiki wake.
Kwa apande wake, Mama Mzazi wa Ray C amemshukuru Rais Kikwete kwa kuokoa maisha ya mwanaye na vilevile ametoa wito kwa watu wanaokusanya michango kwaajili ya mwanaye waache kufanya hivyo kwani matibabu ya Ray C yamegharamiwa na Rais."

Picha zote kwa hisani ya Freddy Maro wa Ikulu.
Hii ilikuwa na bado ni HATUA NZURI kwa uongozi wa nchi kupambana na matumizi ya madawa ya kulevya.
Alilofanya Rais lina faida sasa japo FAIDA KUBWA ITAKUJA IWAPO NAFASI HII ITATUMIWA VEMA.
"Msaada" wa Rais Kikwete umedhihirisha kuwa MATUMIZI YA MADAWA YANATIBIKA na kuwa ni jambo ambalo linapingwa na hata ngazi ya juu ya uongozi wa nchi.
Kwa Ray C kutangaza kuwa "afya yake imeimarika" ni TANGAZO tosha kwa wale wanaohisi kuwa umaarufu wao unawatia aibu kujitangaza, hakuna kosa kufanya hivyo.
Lakini pia limekuwa na udhihirisho kwa wale waliomuona Ray C katika hali ya matumizi na sasa kuweza kukubali kuwa kuna tofauti kubwa uwapo mtumizi na uachapo na ukweli ni kuwa muonekano wa sasa wa Ray C ni mwemza zaidi ya taswira zilizomuonyesha akiwa anatumia madawa ya kulevya
TATIZO......
Tatizo litakuwepo iwapo kilichotokea kitaishia kwenye taswira tulizoziona mitandaoni. NAAMINI kuwa ili juhudi za Mheshimiwa Rais Kikwete ziwe na manufaa, huu ni wakati ambao serikali kuu inaweza kumtumia Ray C kama BALOZI WA KUPINGA MADAWA YA KULEVYA. 
Sote tunajua uwezo wa Ray C jukwaani (na kwengine tunakumbuka uwezo wake mkubwa zaidi alipokuwa radioni), na sote tunatambua kuwa ana uwezo wa kuvuta mashabiki lukuki vijana ambao ndio waathirika wakubwa wa madawa ya kulevya nchini.
NI WAKATI AMBAO SERIKALI INAWEZA KUMALIZIA MATIBABU HAYO YA RAY C na kisha kumuandalia mkakati mzuri wa kuzunguka nchi nzima KUFUNZA VIJANA KUHUSU MADHARA YA MADAWA YA KULEVYA.
Kwa kumtumia mtu huyu ambaye alishakuwa nyota, akaharibikiwa kiasi cha kukaribia kufa na kisha kurejea katika hali njema, kutakuwa USHUHUDA KAMILI wa maisha KABLA, WAKATI NA BAADA ya matumizi ya madawa ya kulevya.
Na naamini
Kwa ushuhuda atakaoutoa Ray C, vijana wengi wataweza kubadilika. Kisha vijana hao nao watumike kama atakavyotumika Ray C kubadili vijana wenzao.
CHANGAMOTO YETU katika tatizo hili ni kujua kuwa TUKIO LA RAIS KUMSAIDIA RAY C NI KAMA UPANGA UKATAO PANDE MBILI, na ni sisi wa kuamua wapi na vipi ukate. Makali ya upanga huu ni namna tutakavyoamua kutumia nafasi hii pekee tuliyonayo kwa ufasaha.
AMA tujikate wenyewe kwa kulipa gharama na kuokoa mtu mmoja kisha tumuache aende zake..
AMA tumtumie yeye, kumpa ajira ya kufunza na kubadilisha ambayo sio tu itamnufaisha yeye, bali na vijana wengine walio katika matatizo haya, ama walio katika HATARI ya kuingia humo. TUMTUMIE RAY C KAMA CHOMBO, TULENGE SHABAHA ILIYO MBELE YETU, ILI KUWEZA KUPUNGUZA TATIZO LA MADAWA NCHINI TANZANIA.
Na huu ni Mtazamo wa namna nionavyo tatizo.....labda namna nionavyo tatizo ndio tatizo

"Kunya anye kuku. Akinya bata......."

Photo Credits LUBP
Septemba 10, 2009 niliandika "bandiko" lenye kichwa kisemacho Unamlaumu Kanumba???? Kwani alimuwakilisha naniiiii???.
Na hiyo ilitokana na LAWAMA NA KASHFA alizopokea Kanumba baada ya kualikwa na kushiriki katika jumba la Big Brother Afrika.
Katika bandiko hilo, niliandika
"Huko alionekana na kuongea na baada ya hapo, watu wamesema meeengi kuhusu yeye (na mimi nilikuwa mmoja wao "waliochonga") lakini baadae nilipoendelea kufuatilia mjadala huu hapa nikawaza. HIVI KANUMBA ALIMUWAKILISHA NANI???
Aliwakilisha kundi la wasomi wachache waTanzania ama kundi la walio wengi wenye elimu ya kati (tena iliyo katika mfumo m'bovu wa kikoloni"?)
Waliomponda wengi wao ni wale "waliosoma" ama wale wanaoishi nje ya nchi ambao nina hakika kuwa hawako kundi moja na Kanumba.
Kanumba alimuwakilisha kijana halisi wa kitanzania ambaye amekulia mazingira ya kusota na kujiwekezea katika juhudi za kazi (na kashfa kiasi) kukuza jina lake. Na kwa hakika kama hili kundi ndilo ambalo Kanumba anapatikana basi tujiulize ushiriki wake kulingana na hawa "wenzake".
Si la wale ambao kwa mihangaiko yao ama ya wawawezeshao (usisahau ufisadi) wameweza kwenda kusoma na kujua "this and that".
(Kanumba) Ni mwakilishi wa kundi letu sisi ambao serikali imetusahau na kutojishughulisha nasi kisha inataka kuja kujivunia sifa za wachache wetu wanaobahatika kufanikiwa.
Si unaijua tena Tanzania yangu. Ivunayo isipopanda (bofya)
Kama Kanumba anawakilisha mamilioni ya vijana wa kiTanzania ambao wana elimu kama yake, unadhani unaweza kumuweka na vijana wanapi ambao wataweza kukaa nyuma ya Camera na kuongea kama alivyoongea???........
Na pengine kwa mazingira aliyosomea, kukulia na hata afanyiayo kazi, tulitaraji Kanumba awe na kingereza cha kiwango gani??
Mbona tupo wengi wenye kiwango hicho na tunawaona wengi hata nchi za nje (kama hapa Marekani) ambao wametoka kwao (mfano waMexico) na kuishi hapa miongo kadhaa na bado hawezi kuunganisha sentensi? Ni kweli kuwa Kanumba kafanya vibaya namna hiyo na si kwamba kuna sababu ya ziada kumshambulia? DaMdogo Candy katika "ulimwengu wake mdogo" ameuliza kwanini watu wengine wako hivi?? (Bofya hapa kumsoma) na japo ilikuwa kabla hili "halijalipuka", lakini ni "walewale" kina sie aliokuwa akijiuliza.
Kanumba alifanya alivyofanya na ni kwa "nguvu zake mwenyewe" bila msaada wa ziada.
Labda angeweza kufanya vema zaidi kama angepitia njia njema zaidi lakini hakupitia.
Na si yeye tu apitiaye alikopitia, bali ni wengi tunaopitishwa huko."
SASA HUYO NI MAREHEMU KANUMBA.
Hivi karibuni, NAIBU WAZIRI WA ELIMU NA UFUNDI wa Jamhuri ya Muungano wa Tanzania Mhe. Philipo Augustino Mulugo akifanya "presentation" nchini Afrika Kusini ambako kwa hakika tunajikuta tukiwaza mengi kuhusu UWAKILISHI WETU KWENYE MAJUKWAA YA KIMATAIFA.
Maswali yanakuwa mengi.
1: Ni nani aliandaa presentation hiyo?
2: Ni nani aliihariri (if any) na kuhakikisha "inatiririka" ipasavyo?
3: Iliandaliwa kwa anayeifahamu ama asiyeifahamu Tanzania?
4: Ni kweli kuwa waliohudhuria waliaminishwa kuwa yule ndiye mtu sahihi zaidi kueleza waelezwacho?
5: Yalifanyika mazoezi ya ku-present hilo?
TAZAMA KISHA FIKIRIA kuhusu "JUKWAA" alilokuwepo Marehemu Kanumba (Big Brother Africa) na hili alilokuwepo Mhe. Naibu Waziri wa Elimu (The Innovation Africa Summit) na kisha ufikirie ni nani aliyekuwa palipostahili umakini wa kunena wanenayo? Maelezo kamili ya video hii yanasema "Hon. Philipo Augustino Mulugo -- Deputy Minister of Education and Vocational Training, Tanzania, speaking on Education for Employment, Developing Skills for Vocation at the Innovation Africa Summit - 5th-7th October 2012 at the Westin Hotel, Cape Town, South Africa. Supported by the Government of South Africa and co-hosted by AfricanBrains and the University of the Western Cape."
Angalia
 (i) Presentation yenyewe,
(ii) Usahihi wa taarifa hiyo
(iii) Uwasilishwaji wake

KARIBU

Huyu ndiye KIONGOZI wa Tanzania....

..........na huu ndio ujumbe wake

Photo Credits: Jeff Msangi

Rushwa inapopingwa kinafiki.....Ujinga mwingine Washington DC..

Photo Credits: Steve Miller Blog
Siku za karibuni kumetokea MAMBO YA AJABU SANA HAPA WASHINGTON DC. Lakini hili la sasa ndio limesikitisha zaidi.
Nimesoma HABARI HII iliyoandikwa na "MWANAMAENDELEO WA DMV" ambaye licha ya kuwa na UWEZO MDOGO WA KUANDIKA, BADO AMEDHIHIRISHA UWEZO MDOGO WA KUJENGA HOJA. Mwana maendeleo huyu wa DMV ambaye hapendi jina lake lijulikane amechefua kwa kusambaza habari hiyo kwenye blog ambazo hazihudumii jamii inayolalamikiwa.
Nimkumbushe huyu MWANA MAENDELEO ambaye hana maendeleo katika kuandika baadhi ya mambo ambayo kwa hakika yanalifanya hili andiko lake lisiwe na "mashiko"
1: Haijulikani mwandishi ni nani (japo anajiita mwana maendeleo)
2: Amesema "WANASHUTUMIWA NA WANAJUMUIYA WA WASHINGTON KWA KUPOKEA RUSHWA KUTOKA KWA CHAMA CHA CHADEMA KWA AJILI YA KUFANYIA PICNIC NA PARTY YA USIKU..." Hao wanajumuiya ni idadi gani na walijumuika wapi kukusanya malalamiko yao?
3: Amesema "WAKEREKETWA WA JUMUIYA WAMEIPA MAMLAKA KAMPUNI YA ERNEST & YOUNG KUFANYA INDEPENDENCE AUDITING YA JUMUIYA ILI KUJUA INCOME AND EXPENDITURE ZA JUMUIYA HIYO ZIMETOKA WAPI NA ZIMETUMIKA VIPI..." Hao wakereketwa wanaotajwa hapa ni kina nani na kwanini wakereketwa wote ni ANONYMOUS
4: Katika sehemu ya mwisho ya maelezo yake ya kusikitisha, huyo mwana maendeleo amesema "HABARI ZA KUAMINIKA NA USHAHISI UPO ZINASEMA KUWA KATIBU WA JUMUIYA BWANA AMOSI CHEREHANI NI MWEKA HAZINA WA CHADEMA WASHINGTON NA NDIYE AMBAYE AMEWEZA KUHAMISHA PESA HIZO KUTOKA CHADEMA ILI ZIWEZE KUFANYA HAFLA HIYO.WANANCHI WANAHOJI KWA NINI MWENYEKITI AMBAYE ALICHAGULIWA KWA KISHINDO AMEWEZA KUKUBALI SWALA HILI WAKATI JUMUIYA HAIFUNGAMANI NA CHAMA CHOCHOTE CHA SIASA?....WAKEREKETWA WA JUMUIYA WAMEIPA MAMLAKA KAMPUNI YA ERNEST & YOUNG KUFANYA INDEPENDENCE AUDITING YA JUMUIYA ILI KUJUA INCOME AND EXPENDITURE ZA JUMUIYA HIYO ZIMETOKA WAPI NA ZIMETUMIKA VIPI KABLA YA HATUA ZAIDI KUCHUKULIWA...WANAJUMUIYA TUNAOMBA KUITISHA MKUTANO NA KUPIGA KURA ZA MAONI YA KUWA NA IMANI NA UONGOZI KWANI BADO NIMCHANGA NATULIUCHAGUA KWA IMANI HATUTAKI VYAMA VYA SIASA VITUINGILIE...RUSHWA NI ADUI WA HAKI!"
Kwani hapa tatizo ni party ama muingiliano wa tarehe na uzinduzi wa tawi la CCM hapa?
Nafurahi kuona kuwa si viongozi wa jumuiya wala wa CHADEMA waliojibu UTUMBO huu kwa kuwa hii ni sawa na kumkimbiza taahira aliyechukua nguo zako ukiwa uchi.

Na huu ni mtazamo wa namna nionavyo tatizo.
Labda namna nionavyo tatizo ndio tatizo.

VODACOM......Hata ninyi?

Wiki iliyokamilika, kampuni ya simu ya VODACOM imetoa tuzo kwa bloggers kadhaa katika kuthamini mchango wao kwenye fani hii.
Katika orodha hiyo, sina shaka na yeyote aliyeshinda kwa sababu kuu mbili.
1: Wote wa walioshinda wanatenda kazi na kazi zao zina mafanikio kuliko blogu hii.
2: Sijajua ni vigezo gani vilitumika kupata washindi.

Lakini kama ambavyo niliandika mwaka jana wakati wa kusaka TUZO ZA BLOG BORA TANZANIA, kuna umuhimu wa watu kujua kwanini wanashinda na ama / kushindwa katika mchakato wowote.
KATIKA HILI....HAIKUJULIKANA. Nilisoma habari za tuzo hizi siku zilipotolewa na nikawaza baadhi ya mambo ambayo niliwaza wakati wa tuzo za awali za blogs.
Niliandika HAPA kwamba "KABLA HATUJAWA NA TUZO ZA BLOGU BORA tutekeleze ambayo naamini ni muhimu KUWEKANA SAWA kwa wateua na wateuliwa. Naulizia ama kuelezea VIGEZO kadhaa. 

-Kwanza BLOGU NI NINI? Na ni vipi tunaweza kuziunganisha ama kuzitenganisha na "forums" mbalimbali kama Jamii ama Wanabidii? 

-BLOGU ZINA JUKUMU GANI na ZINAWAFIKIA VIPI WALENGWA? Ni kweli kuwa blogu zetu zinajipenyeza kuelekea kwenye uhitaji? 

-BLOGU ZINATHAMINIKA kwa umaarufu wa wamiliki ama maudhui kwa jamii? 

-UBORA WA BLOGU NI UPI? Idadi ya watembeleaji? Kama ndivyo basi Ze Utamu yaweza kuwa blogu bora zaidi kupata kutokea kwa waTanzania. Ama ni MAUDHUI yenye kuifaa jamii? 

-UPI UELEWA WA WATEUZI? Wateuzi watakaoteua ni bloggers ama wasomaji? 

KATIKA ORODHA ILIYOTOLEWA...... 

Ningependa kuona TUZO YA HESHIMA KWA KAKA NDESANJO MACHA. Muasisi wa blogu za kiswahili na ambaye anaendelea na mambo ya tovuti katika kukikuza na kukiendeleza kiswahili..."
NIACHANE NA MENGINE...nirejee kwa Kaka Ndesanjo Macha.

Kwa VODACOM kushindwa kuthamini mchango wa yule aliyefungua njia kwa maelfu ya bloggers nchini ni JAMBO LA KUSIKITISHA JAPO SIO LA KUSHANGAZA.
Kwa Tanzania yetu, tuna watu wengi waliofungua njia kwenye MUZIKI, UTANGAZAJI, UIGIZAJI na fani nyingine nyingi lakini hawathaminiki kwa kuwa wakati muafaka wa kuwaenzi HATUWAENZI.
Blogu hii imekuwa ikiandika kuhusu umuhimu wa kuwathamini waliofungua njia katika fani mbalimbali.
August 2008, tulibandika HAPA swali NI LINI TUTAWAENZI WATU HAWA? Na hii ilikuwa ni kwa ajili ya waasisi wa muziki. Miezi mitatu baadae tukaweka bandiko jingine HAPA kuhusu watu ambao HATUWATHAMINI KWA KUWA HATUWAJUI, mwaka uliofuata tukaweka bandiko HILI kuhusu TANZANIA YANGU...INAYOPUUZA HALL OF FAME NA KUTUKUZA HALL OF SHAME ambalo lilitoka miezi mitano baada ya HILI lililosikitisha habari za walezi wetu katika tasnia ya HABARI ambao TUNAWAPENDA, HATUWATHAMINI KWA KUWA HATUWAJUI
Kwa hakika VODACOM mmesikitisha kwa mlichofanya.
Mmeshakuwa na mkilalamikiwa na baadhi ya bloggers juu ya udhamini wenu kwenye blogu mbalimbali.
Mnajali IDADI YA WATEMBELEAJI hata kama baadhi ya blogu mnazodhamini ZINADHALILISHA na zimejaa MATUSI.
Naungana na Kaka Bonny Makene katika alilosema HAPAkuhusu tuzo hizi.

KWA UJUMLA......NILITEGEMEA VODACOM MNGEFANYA MCHUJO MZURI NA KUSAIDIA KUTHAMINI WALIOONYESHA NJIA, KUTOA CATEGORIES MLIZOFUATA NA KISHA KUWAELEZA WENZETU WANAOFANYA KAZI NZURI YA KU-BLOG WAWEZE KUSHIRIKI.

Na huu ni mtazamo wangu kwa namna nionavyo tatizo.
Labda NAMNA NIONAVYO TATIZO NDIO TATIZO

Ya Dr. Ulimbomba na akisi UTU wetu.

Kati ya habari za kusikitisha hivi karibuni nchini Tanzania ni kitendo CHA KIBINADAMU (kwa kuwa hakuna mnyama anayejulikana kutenda haya) alichofanyiwa Kiongozi wa mgomo wa madaktari nchini Dr. Ulimboka David.
Daktari huyu ambaye kwa mujibu wa taarifa zilizotolewa ALITEKWA NA KUTESWA sana ikiwa ni pamoja na kung'olewa baadhi ya kucha na meno, amesafirishwa kwenda nje kwa matubabu zaidi.
Lakini NINI CHANZO CHA HAYA YOTE?.......UTU. 
UTU wa wale waliosababisha mgomo huu kuanza. Wapo wanaolaumu serikali kwa kupuuza UTU wa madaktari na kutotimiza mambo ambayo walikubaliana.
Lakini wapo wanaolaumu UTU wa madaktari kwa kuendekeza maslahi yao mbele na kusahau umuhimu wa kazi zao na hata maisha ya wananchi wasio na hatia wanaopoteza maisha yao.
Wapo wanaolaumu UTU wa wale waliomteka mtu aliyekuwa akitetea UTU wa madaktari ambao wanaonekana kutojaliwa na hivyo kuathiri UTU wa watu wengi nchini.
SINA HAKIKA na chanzo halisi cha tatizo, na siamini kama ni madaktari ama wafanya maamuzi serikalini wanaoathirika na mgomo huu, lakini ninalojua ni kuwa UTU umewekwa kando katika tatizo hili.
Tumekosa UTU kwenye sababu mpaka namna ya kupata suluhisho la tatizo hili.
Kilichomkuta Dr Ulimboka, ni hakika UKOSEFU WA UTU na kutanguliza maslahi binafsi ambayo sio tu yanadhihirisha ukatili wa binadamu, bali pia yanazidisha ukatili kwa binadamu.
Tumeona kuwa hata idadi ya madaktari waliogoma imeongezeka katika kukerwa na kilichomkuta mwenzao ikimaanisha kuwa hata waathirika wa mgomo wameongezeka. UTU WA WENGI ZAIDI UKO MASHAKANI.
YAMEANZIA WAPI?...NA MWISHO WAKE NI UPI?
Labda maswali haya yafuatiwe na swali la NI NANI MUATHIRIKA wa mgomo huu?
Yote juu ya yote, iwapo tungeweka UTU mbele, maombi ya madaktari yangeangaliwa vema, na madaktari nao wangedai kwa UTU zaidi na hivyo UTU wa wananchi sisi usingekuwa hatarini.
Hata wale waliodhani kutatua mgomo kwa kutenda yasiyo na UTU kwa daktari huyu wangetumia njia nyingne, tungekuwa na MTAZAMO MWINGINE kuhusu tatizo hiliu.
TUREJESHE UTU katika kutafuta suluhisho la matatizo yetu, kwani kukosekana UTU kunaathiri zaidi UTU wa wale walio mbali na mgogoro husika.

NIONAVYO MIMI...Habari za utafiti wa "Kikombe cha Babu" ni upotoshaji

ONYO:
Usisome hapa kama huna muda wa kutosha "kumeng'enyua" kiandikwacho

Siku tatu zilizopita, Gazeti la Serikali la Habari Leo liliripoti hapa kuwa "Waliopata ‘Kikombe cha Babu’ wafariki dunia".
Katika habari hiyo ambayo KICHWA CHA HABARI HAKIAKISI UHALISIA WA MAUDHUI YAKE, waandishi wamesema "Wizara ya Afya na Ustawi wa Jamii ambayo sasa itatangaza matokeo ya utafiti wa tiba hiyo ya ‘Kikombe cha Babu’ imesema wengi ni wale wenye Ukimwi walioacha matumizi ya dawa za kurefusha maisha (ARVs).

Kaimu Katibu Mkuu wa Wizara ya Afya na Ustawi wa Jamii, Regina Kikuli, aliiambia Kamati ya Kudumu ya Bunge ya Hesabu za Serikali (PAC) jana Dar es Salaam, kwamba hadi sasa Serikali inafanyia utafiti watu 206 ambao walipata kikombe hicho."
Ukisoma kichwa cha habari (Waliopata ‘Kikombe cha Babu’ wafariki dunia) kisha ukasoma kilichoandikwa ndani utagundua utata na mapungufu (kama sio upotoshaji wa makusudi) wa habari hii.
KWANZA.
Kwa mujibu wa Kaimu Katibu Mkuu wa Wizara ya Afya na Ustawi wa Jamii, Regina Kikuli aliyenukuliwa katika habari hiyo, "Serikali inafanyia utafiti watu 206 ambao walipata kikombe hicho". Na kisha, habari hiyo ikaongeza kuwa “Kwa sasa ni vigumu kusema dawa hiyo inaponya au haiponyi, tusubiri utafiti wa kitaalamu. Baada ya miezi miwili tutatangaza matokeo kwa umma,” alisema Kikuli na kuongeza kuwa utafiti huo unafanywa katika hospitali mbalimbali nchini chini ya usimamizi wa Taasisi ya Utafiti wa Magonjwa ya Binadamu (NIMR).
Lakini uwiano huu ni wa watu 206 kati ya wangapi?

Taarifa hiyo imesema "Kaimu Mganga Mkuu wa Serikali, Donan Mmbando, alikiri kuwa wagonjwa wengi wa Ukimwi waliokwenda kupata tiba hiyo na kuachana na ARVs wamepoteza maisha."
Na hili linanipeleka kwenye swali langu la pili kuwa WALIFUATA MASHARTI YA TIBA YA BABU?
Mara kadhaa, Mch Mwasapile amekaririwa akisema kuwa WATU WASIACHE MADAWA WANAYOTUMIA KWA KUWA WAMEPATA KIKOMBE, na kwa maana hiyo, kama watu waliendelea kutumia dawa zao, na wakafa (hasa wale wa wanaofanyiwa uchunguzi), ni kipi kitakachoonyesha kuwa wasingeitumia wasingekufa ama wangeishi zaidi ya walivyoishi baada ya kunywa dawa hiyo?
Ukweli ni kuwa kama walikuwa wakitumia dawa zao za awali na ya Babu, basi hakuna ushahidi kuwa kilichowaua ni DAWA YA BABU, lakini pia kama waliacha kutumia dawa zao baada ya kutumia kikombe cha babu, basi WAMEKIUKA MASHARTI.
Lakini ni wangapi waliokufa baada ya kunywa kikombe hicho?
Idadi hiyo ni asilimia ngapi ya wote waliokunywa dawa yake?Walioenda kwa Babu wa Loliondo ni Mamia ya maelfu ya watu, na bado wanakwenda, kwa hiyo ningeomba ripoti hiyo itakayokuja ifanye kitu hicho hicho kwenye hizo hospitali za Bugando, Mwanza; Mbeya; Mount Meru, Arusha; Hydom, Manyara na KCMC, Kilimanjaro ambako uchunguzi huo unafanyika kwa kukusanya idadi ya watu sawa na wale waliokwenda kwa "Babu", kisha fuatilia kati ya hao watu, na ndani ya muda ambao "Babu" alikuwa akitoa matibabu Loliondo, ni wangapi walikufa (Hospitalini na nyumbani) kisha tujue kama ni kweli kuwa waliokufa kwa baada ya kutumia dawa ya "Babu" Loliondo ni wengi kuliko wale wanaokufa kwenye hospitali zetu "kubwa".
Tusisahau kuwa safari ya Loliondo ilihusisha wale ambao walishakata tamaa na walishatoka hospitali.
Kwa Maana nyingine, "Loliondo kwa Babu" kulikuwa kama HOSPITALI BAADA YA HOSPITALI YA RUFAA.
Lakini pia zi-wapi SHUHUDA KAMA HIZI za wale waliopona ama kupata nafuu baada ya kutumia dawa hii?
Ni kweli kuwa watu mia mbili na sita kati ya laki kadhaa walioenda kutibiwa (tena wenye maradhi sugu) watatoa "sample" sahihi juu ya matibabu haya? Dadangu Jestina George alipokuwa akichangia kwenye mjadala huu tuliokuwa nao jana kwenye ukurasa wa Facebook akatoa maoni ambayo naamini kama yatazingatiwa, italeta taswira nzuri zaidi kwenye mchakato huu. Alisema "Na vifo vingi vilitokana na hali ya jinsi ya kufika kule maana kulikuwa na tabu sana ya usafiri na pia ques were long. Mtu anatoa ndugu yake hospital aliye kuwa mahututi alitegemea nini? "
Bado naamini kuwa utafiti huu si makini na NIONAVYO MIMI......HABARI ZA UTAFITI WA KIKOMBE CHA BABU NI ZA UPOTOSHAJI

Na huu ni MTAZAMO wangu kwa namna nionavyo tatizo....
Labda namna nionavyo tatizo, ndio tatizo.

Brother Lusinde.....Labda ukimya ni njia bora ya kuomba msamaha kuliko ufanyalo.

Katika mafunzo yangu ya habari (tena muhula huu) nikafunzwa kuwa moja kati ya mambo yanayoweza kufanya kitu kikazungumzwa, kuandikwa ama kuonyeshwa kwenye vyombo vya habari na kutambulishwa kama HABARI ni kuwa "IT IS OUT THERE".
Na maana halisi ya hili, ni kuwa jambo linaweza kuwa "covered" kwa kuwa limekuwa GUMZO, na kuwa watu wengi wanafuatilia na wengi wangependa kujua mengi kuhusu hilo. Na kwa maana hiyo, nimeona ni vema nami nikatoa ushauri wangu kwa (aliyestahili kuitwa) Mhe. Livingstone Lusinde. Mbunge wa jimbo la Mtera ambaye katika kampeni ya uchaguzi jimbo la Arumeru Mashariki alitoa kauli mbaya sana ambazo hazikuwa na lolote lihusulo siasa wala wanaArumeru Mashariki. Kwa hakika alisikitisha.
Na leo (kama anavyoonekana hapa chini katika picha iliyobandikwa kwenye ukurasa wa Facebook wa Clouds Fm) alikwenda kwenye kituo cha Clouds Fm na kuzungumza kuhusu hilo na pia kuomba msamaha kwa kauli zake. Unaweza kusikiliza mazungumzo haya HAPA KWENYE TOVUTI YA Dada Subi.
Na namuita "aliyestahili kuitwa Mheshimiwa" kwa kuwa naamini uHESHIMiwA unakuja unapojiheshimu. Na naamini kuwa ni kejeli kumuita Mheshimiwa kwa kuwa wengi hawamheshimu kwa sasa.
Nasikitika kuiweka VIDEO HII HAPA lakini ili nitakachosema kieleweke, naomba nifanye hivyo.
NINAOMBA RADHI KWA HILI

Niliwahi kusema kuwa WAKATI MWINGINE, UKIMYA NI HOTUBA NZURI ZAIDI na naamini kama hii ndio njia pekee ambayo Bwn. Lusinde ameamua kutumia kuomba msamaha, basi ni afadhali angekaa kimya.
Bwn. Lusinde. Huwezi kutukana watu namna ile jukwaani Arumeru kisha ukaenda kuomba msamaha kwenye kituo cha radio Dar Es Salaam. Unastahili kufanya hivyo jukwaani ama uende kwenye kituo cha radio Arumeru ukaombe msamaha.

Na bado nasubiri kujua kile ambacho KAMATI YA MAADILI YA CHAMA CHA MAPINDUZI itafanya juu yake. Niliwahi kugusia suala la maadili ndani ya chama hicho nilipopata nafasi ya kuhojiana na Katibu Uenezi wa Chama Ndg. Nape Nnauye na HAYA NDIYO ALIYOSEMA

Hiviiiiiiii...Bwn. Lusinde anapoomba radhi na kusema anajutia aliyosema, wale "wafuasi" waliokuwa wakishangilia maneno yake wanajifikiriaje? Hawakujua walikuwa wakishangilia yasiyostahili ama walijua na yalistahili ila Lusinde kawasaliti?
Na.......
Ni kweli kuwa angeomba radhi iwapo wangeshinda? Ama ndio angesema "wamewazalia" watoto aliotabiri watazaliwa Aprili mosi?

Ukweli wa mambo ni kuwa Bwn. Lusinde ulikosea, na umefanya vema kuomba msamaha, ila msamaha huo, haujauomba vema, kwa hiyo umefuta nia njema ya kufanya lililo jema.
Na kama hiyo ndio njia pekee ambayo utatumia kuomba msamaha.......Labda ukimya ni njia bora ya kuomba msamaha kuliko ufanyalo.

Ni makuzi na mazoea yanayoendesha ndoa yako

Hapo awali nilipata kuandika kuhusu NDOA vs HARUSI ambapo nilieleza lile ninaloamini kuwa "Mahusiano yake ni madogo sana (kama yapo) na pia mafanikio ya moja kati ya hayo hayana AKISI ya moja kwa moja kwa jingine. Tofauti baina yake ni kubwa kuliko inavyochukuliwa na umuhimu wa elimu juu ya uelewa wake ni zaidi ya inayotolewa.
Nilielezwa kuwa HARUSI ZOTE ZAFANANA JAPO KILA NDOA NI YA KIPEKEE. Na kuwa waweza kuwa na ndoa bila harusi na harusi isiyo na ndoa ya kweli."
Kisha nikarejea kwenye SWALI LA MSINGI kuwa "Kwanini tuwe na NDOA na HARUSI kama uhusiano wake waweza kutomaanisha lolote kwa pamoja?"
Lakini kabla ya NDOA na hata HARUSI kunakuwa na MAZOEA YANAYOTOKANA NA MAKUZI tuliyokuzwa kabla hatujakutana na "asali wa moyo" wetu. Na haya yana nafasi kubwa saana katika maisha yetu.
Ni wazi kuwa jamii nyingi za kiAfrika zimejengwa ama kujijenga kwenye mfumo ambao MWANAUME NI KICHWA CHA FAMILIA. Na hili linaifanya jamii iwaone wanawake kama "daraja la pili" katika familia.
Na ndio maana hata inapotokea mwanaume akafanya baadhi ya mambo "yasiyokubalika", anaweza kuonekana kama anafanya "jambo la kiume" ilhali jambo hilo likitendwa na mwanamke, itaonekana KITUKO.
Mfano mdogo ni ULEVI. Kwa mwanaume kulewa mpaka kesho yake akaokotwa mtaroni yaweza kuwa "uanaume" ilhali mwanamke akilewa akawa anaanguka na kuamka mpaka akafika kwake, anaweza kuwa "gumzo la mtaa". Anyway. Tuachane na haya
Lakini pia kuna MAKUZI yawafanyao kinadada "KUNYWEA" katika mahusiano, na hasa katika hatua za mapenzi na unyumba, jambo ambalo humfanya kijana kujiaminisha kuwa hiyo ndiyo tabia halisi ya binti, na kwa kuwa binti huyo ameonyesha utayari wa kuvumilia karibu kila upuuzi wa mwanaume, inamjengea u-sugu wa ujinga mwanaume.
Ukweli wa mambo ni kuwa JAMII YETU HAIJENGI MAZINGIRA HALISI YA NDOA kabla ya ndoa.
Labda ni kwamba HATUWAFUNDISHI WATARAJIWA KUHUSU MAISHA HALISI YA NDOA (na namaanisha ndoa na sio "vishikizi vidogo vya ndoa" mnavyofundishana kwenye kitchen party na jando na unyago).
Tatizo kubwa ni kuwa watu wengi HAWAJIANDAI KUINGIA KWENYE NDOA na wengi wao wanashindwa hata kutofautisha kati ya NDOA na HARUSI na matokeo yake, kile kiitwacho MIPANGO YA NDOA huonekana kuwa na thamani na kufika tamati pale HARUSI (ambayo wengi huiita ndoa) INAPOFUNGWA.
Ni kama vile watu wanaamka asubuhi baada ya harusi na kujiuliza "now, what next?"
Maana ni kama AMEFIKIA TAMATI YA MIPANGO YAKE YOOTE na sasa anaanza upya kusaka kitakachomkalisha kwenye ndoa.
Haya ni MAZOEA KWENYE JAMII YETU, AMBAYO NAYO HULETA MAKUZI AMBAYO KUYATENGANISHA UKUBWANI SI KAZI RAHISI.
Na kwa maana nyingine, ni hayahaya MAKUZI ambayo yanakuwa sehemu ya ndoa zetu na kwa asilimia kubwa hayawi kwa faida yetu.
Labda kwa ndugu zangu mlio kwenye mchakato wa kumtafuta wa kuishi naye, ni vema kuangalia mambo muhimu katika maisha ambayo mngependa kuyakamilisha, na kisha kuangalia namna ambavyo mtaweza kuyakamilisha na mwisho kuangalia yule atakayeweza kukusaidia kuyakamilisha.
Kama ambavyo nimekuwa nikieleza kwenye vipindi mbalimbali vya radio ninavyoshiriki, "UWE NA UFAHAMU WA KILE UNACHOTAKA (VIGEZO), KISHA ANGALIA KAMA YULE AJAYE ANA VIGEZO HIVYO". Kuwa makini kutoweka vigezo visivyovikika lakini pia, kuwa makini kwa kutoanza kupanga vigezo kuweza kuhitimisha lengo lako la kuwa na fulani. Kuwa makini katika mipango yako na kuepuka "KUTAKA NDOA KAMA YA FULANI" kwani maneno hapo juu yanajieleza kuwa "HARUSI ZOTE ZAFANANA JAPO KILA NDOA NI YA KIPEKEE".
Katika kujazia harakati hizi za maandalizi mazuri ya ndoa, napenda kukukaribisha kusikiliza maelezo haya hapa yanayoeleza kuhusu NJIA 10 ZINAZOWEZA KUKUEPUSHA KUOANA NA MTU ASIYE SAHIHI.
Karibu katika maelezo haya juu ya Njia kumi za kukuepusha kuoa mtu asiye sahihi. Maelezo haya yaliandikwa na Dr Nafisa Sekandari na Hosai Mojaddid. Sehemu ya andiko hili lilitokana na maelezo ya Rabbi Dov Heller wa Massachussets. Yalibandikwa kwenye kipengele hiki cha Mental Health for Muslims.
Yametafsiriwa na Jovitha Mchalla na kuhaririwa na kusimuliwa nami
KARIBU

Haki za UTU WETU na uhuru wa UANDISHI WETU

Katika maandalizi ya mkutano wa Diaspora wa mwaka 2010 nchini Uingereza, blogger Issa Michuzi alinukuliwa akisema kuwa "Kwa mahesbu ya haraka haraka hivi sasa kuna blog zinazotumia lugha ya kiswahili zipatazo 200 ambapo pia blog takriban 10 zinaanzishwa kila siku, na kuifanya Tanzania kuw nchi zinazoendelea katika tasnia ya habari kwa njia ya mtandao."
Hayo yalikuwa mahesabu ya mwaka 2010. Sasa hivi blogu ni nyingi saana. Yaani hata sisi bloggers hatujuani. Na wingi wa blogs hizi hauendani na wingi wa mafunzo (japo ya awali) kuhusiana na suala zima la uandishi na maadili yake.
Na hapa linalosemwa si kwamba kila blogger lazima awe mwandishi ama awe na elimu ya uandishi, lakini ninalomaanisha ni kuwa kuna MAADILI ya uandishi ambayo NILAZIMA tuyafuate kama tunajua kuwa kuna jamii inayotutegemea katika kuwahabarisha, kuwaelimisha na kuwakomboa kiakili.
Kwa siku za karibuni kumekuwa na matukio mengi mabaya na ya kutisha nchini Tanzania na mengine yamehusisha mauaji na matendo ya kikatili kwa wanajamii. Licha ya shukrani za dhati kwa wana-blog kwa kuweka wazi matendo hayo, bado narejesha OMBI la kuzingatia MAADILI katika kuweka picha na maelezo.
Ninaloomba ni kuzingatia UTU hata wa Marehemu na pia kuthamini HESHIMA ya marehemu na nduguze.
Kumekuwa pia na shida ya kuweka majina na / hata picha za watoto wenye umri wa chini ya miaka 18.
Ni OMBI katika kuona namna ambavyo tunaweza kuendeleza UTU WETU wakati tukiendelea kutimiza UHURU WA UANDISHI WETU.

Tukingali pamoJAH.
Tuonane NEXT IJAYO

Nawaombea viongozi wapate ajali kama zetu, wahisi maumivu yetu, watatue tatizo letu na kuokoa maisha yetu.

Photo Credits:Orlando Grace Church
Mafunzo ya imani yanatufundisha ama kutuelekeza kuwa BINADAMU WOTE NI SAWA.
Ni kuwa licha ya tofauti zetu za mali, rangi, imani, pesa, kimo, kabila nk bado tu-sawa na TUNA UHAI ULIO SAWA.
Lakini HILI SI KWA WATAWALA wetu. Tumejengewa TOFAUTI KUBWA SANA KATI YA UHAI WA MTAWALA WETU NA MWANANCHI WA KAWAIDA. Uhai wa hawa wajiitao VIONGOZI umeonekana kuwa na thamani sawa na makumi, mamia na ama maelfu ya wananchi wanaowaongoza. KIFO CHA KIONGOZI NI KIFO, LAKINI CHA MWANANCHI NI TAKWIMU (hata kama wote wamekufa kwa sababu inayofanana). Ndio maana awapo kiongozi hata shughuli za nchi zitasimama, japo ili zisimame kwa mwananchi, lazima liwe JANGA LA KITAIFA.
Na ndio maana thamani ya mwananchi wa kawaida haionekani katika mikakati ya serikali kujali uwepo wao. Kwa maana nyingine ni kuwa VIONGOZI WETU HAWATUJALI.
Tumeshuhudia namna ambavyo watawala wa nchi mbalimbali wanavyotumia maelfu ya maisha ya wananchi wao KUKINGA NAFASI NA MAISHA YAO.
TATIZO la ajali kwa TANZANIA si tatizo la jana wala juzi. Si tatizo ambalo tunaona likipata unafuu wowote na hasa siku ama nyakati hizi za mwisho wa mwaka ambapo wasafiri huongezeka, wenye magari KUTAMANI PESA ZAIDI na wenye mamlaka ya kusimamia sheria za barabarani "KUCHUMA" ZAIDI. Wananchi KUTAMANI ZAIDI KUFIKA ilhali wakipuuza njia sahii za kuwafikisha huko nk. YOTE JUU YA YOTE, NYAKATI HIZI USALAMA HUPUUZWA NA AKILI KUWEKWA KWENYE PESA.
Na KAMA KAWAIDA ya serikali yetu, haionyeshi kuwa na mikakati madhubuti ya kupunguza na pengine kufuta ajali za kizembe, bali kitakachofuata ni SALAMU za rambirambi toka kwa viongozi. Nilisema hapa kuwa TUMECHOSHWA NA SALAAM ZENU ZA RAMBIRAMBI NA SASA HATUZITAKI. Kila salaam ya rambirambi inaambatana na ONYO KALI KWA WATENDAJI kuhakikisha kuwa ajali zinapungua ama kushughulikiwa, lakini hakuna tofauti. Kwenye salaam zake za mwanzoni mwa mwaka 2009, Rais Kikwete alisema "hatuwezi kuvumilia kutokea kwa ajali hizi wakati mamlaka zenye dhamana ya kusimamia sheria za usalama barabarani zipo. Tufanye jitihada zote zilizo ndani ya uwezo wetu kupunguza kwa kiwangi kikubwa na ikiwezekana kukomesha kabisa ajali hizi za barabarani ambazo zimeshapoteza maisha ya wenzetu wengi"
KUNA MABADILIKO GANI YA DHATI YALIYOFANYWA?
Kwa mujibu wa ripoti hii ya kwanza kutolewa na Shirika la Afya la Umoja wa Mataifa (WHO) kuhusu hali ya dunia katika usalama wa barabarani, watu milioni 1.3 hufa kila mwaka na kati ya milioni 20 na 50 hupata majeraha makubwa katika ajali. Na kwa mujibu wa TAKWIMU HIZI KAMILI juu ya ajali hizo, Tanzania inayokadiriwa kuwa na watu takriban milioni 40.4 inapoteza watu (wanaoripotiwa) 34.3 katika kila watu 100,000 kutokana na ajali za barabarani. Hii si idadi ndogo hata kidogo na hasa ikizingatiwa kuwa asilimia kubwa ya ajali hizi zingeweza kuepukika kama serikali ingeweka mkakati mzuri wa kukabiliana na tatizo hili.
Baraza la mawaziri lililotangazwa Novemba 2010 lilikuja na utata wa nani atakayekabiliana na suala la ajali, na kwa kuwa HAKUNA aliyekubali kutekeleza OMBI HILI lililowataka MAWAZIRI WAORODHESHE WATATENDA NINI, VIPI NA KUFIKIA LINI, bado swali linabaki palepale kuwa "Ni nani atakayechukua jukumu la kushughulikia kuzuia ajali na kuratibu usalama wa wananchi? Je! Ni Wizara ya Ujenzi (Barabara na Uwanja wa Ndege), Wizara ya Uchukuzi (Reli, Bandari, Usafiri Majini) ama Wizara ya Usalama wa Raia (ambayo hata sijui imekuwa "faded" ndani ya wizara ipi? Ama ni wizara gani?)"
Leo hii bado tunasikia vifo vingi vitokeavyo kutokana na ajali ambazo bado twaamini nyingi zingeweza kuzuilika.
Tumezoea kusema AISIFIAYE MVUA IMEMNYEA. Kweli, na mimi MVUA YA AJALI ILININYEA. Lakini tusisahau kuwa si kila aina ya mvua ikunyesheayo hukupa nafasi ya pili ya kukauka na kuwa kama ambaye hakuguswa nayo. Kuna masimulizi ambayo huwakuta watu walionyeshewa na mvua hizo ambayo wanatamani wasingekuwa wasimuliaji wa habari ama hali hizo na licha ya juhudi zao za hali na mali katika kuhakikisha hatupitii yale wapitiayo wao, bado twapuuza na matokeo yake ni sisi kuteketea.
TUSISUBIRI MVUA YA AJALI ITUNYESHEE KWANI HATA TUKIPONA, HATUTAKUWA KAMA TULIVYOKUWA AWALI.
Kwa kumbukumbu niliyonayo, mara ya mwisho niliposikia serikali ikionekana kuamka na kuzungumzia tatizo la ajali kwa namna ya suluhisho ni pale lilipohusisha WAHESHIMIWA. Na kwa hakika tuliona mabadiliko kidogo mpaka walipoonekana kuwa salama TUMEREJEA KWENYE KULIPUUZIA.
Hili linanifanya niamini kuwa serikali haioni tatizo la ajali kwa waTanzania mpaka pale litakapowahusisha viongozi, na ndio maana sasa natamka wazi kuwa NAWAOMBEA VIONGOZI WAPATE AJALI KAMA ZETU, WAHISI MAUMIVU YETU, WATATUE TATIZO LETU NA KUOKOA MAISHA YETU.

Ni kipi tulichopoteza kwenye muziki wetu kisichorejesheka?

Komandoo Hamza Kalala. Unakumbuka solo yake akiwa Vijana, Washirika na Bantu ya mwanzo?
Hussein Jumbe alipokuwa Sikinde na Msondo si sawa na yule aliyekuwa TOT.

Miaka inavyozidi kwenda ndivyo teknolojia inavyoongezeka ama kukua na kuonekana kurahishisha utendaji kazi katika nyanja mbalimbali. Muziki kama sehemu ya maisha ya wengi, nao umeathiriwa kwa namna moja ama nyingine na mabadiliko na ukuaji wa teknolojia ambayo imeufanya uweze kuwa wa kisasa na wenye kutengenezwa kwa muda mfupi, ubora wa hali ya juu na pia gharama za chini kiasi kutokana na vyombo vya kisasa katika kuzalisha ama kutengeneza muziki huo.
Lakini hili halionekani kuwa na ukweli katika aina zote za muziki ama muziki toka sehemu zote maana kwa mtazamo wangu naona kama muziki wa Tanzania sasa unazidi kupoteza dira kwutokana na "uvivu " wa watayarishaji na wasanii wenyewe. Naliona hili katika mambo kadhaa ambayo naamini si vibaya kuyaweka bayana katika kusaka suluhisho la hii changamoto yetu inayotukabili.
Ubora wa muziki na wanamuziki unatofautiana saana ukilinganisha sasa na zamani. Hapa ni kuanzia muda wanaoweza kufanya ama kutumbuiza jukwaani bila kuchoka ama kukaukiwa sauti. Pengine ni kutokana na kutofuata maadili na kuendekeza vilevi ambavyo vinaathiri saana undani wa njia ya sauti huku wakiacha mazoezi na matokeo yake kudhoofisha sauti na uwezo wao katika kutumbuiza bila wao kujua. Pia "kupea" kwa tunzi nyingi za sasa ambazo mara nyingi zinakuwa na ujumbe mfupi, mwepesi na usiopigania hali halisi ya mtanzania wa kawaida huku wakiendekeza anasa na kutajana majina na kisha kuwekeza mkazo katika vibwagizo ambavyo kutokana na ukosefu wa zana halisi za muziki vinakosa mvuto wa hisia na matokeo yake kupoteza kila kilichokusudiwa. Kuna mifano ya wasanii ambao walipata kuvuma na bendi za zamani na wakachoropoka kupiga ule uitwao muziki wa kisasa ambao umewatoa katika ramani ya muziki. Nyota kama Komandoo Hamza Kalala aliyejenga heshima sana akiwa Vijana na hata Washirika Tanzania Stars na miaka ya mwanzo ya Bantu Group lakini alipoingia na style ya kikongokongo kusaka maslahi tunaona alivyoporomoka mpaka watu kutokumbuka albamu kama Ngozi ya Kitimoto. Hata Marehemu Eddie Sheggy, Mhina Panduka na Hussein Jumbe ni baadhi ambao wanakubalika katika nyimbo zao wakiwa na bendi zinazopiga muziki halisi kuliko walipokuwa Bantu (Sheggy), TOT (Panduka na Jumbe).
Matumizi ya zana / ala za muziki kwa sasa yanapoteza uzito wa muziki. Kutaka kupiga muziki wa ki-Tanzania kwa kutumia kinanda (keyboard) pekee kama wafanyavyo baadhi ya wasanii chipukizi (ktk mahadhi yote) kunapoteza saaana "rythim" yake. Ukisikiliza miziki ya Zouk, Bongo Fleva na mingine ya kutengenezwa kwenye vinanda unaona mapungufu mengi kwani kisicho halisi chajidhihirisha. Wanakosa na kushindwa kutumia "percussions" halisi na hata kushindwa kushirikisha "wasanii huru" katika zana mbalimbali kama Trumpet, Saxaphone, Marimba na vingine vinavyoongeza ladha ktk miziki.
Maudhui katika tunzi za sasa mengi ni kulingana na matukio ambayo kwa hakika ni ya muda mfupi. Wapo wanaoimba na kuvuma kwa kuimba kuhusu ugomvi wak na wapenziwo halafu ukifika wakati wimbo unakuwa katika kile wanachoita "kupanda na kushika chati" unakuta wapendwa hawa wamesharejeana na wanapanga kuoana. Hapo utaona hata mwenye wimbo hataki tena kuusikia maana ujumbe si halisi tena. Nafikiri kuna MATATIZO NA MAHITAJI ya miaka mingi aya mTanzania mabyo wasanii wanaweza kuyagusa na kuyaweka bayana na wimbo utaendelea kuwa na ujumbe uleule mpaka matatizo hayo yatakapokwisha. Hapo ndipo msanii anapokuwa "mpiganaji" na SAUTI YA JAMII. Si unakumbuka nyimbo kama Ndoa ya Mateso (Dar Jazz), Mama wa Kambo (Vijana Jazz), Usia kwa Watoto (Juwata Jazz) na nyingine nyingi ambazo ujumbe wake uko palepale kama ulivyokuwa wakati zinaandikwa na kwa sababu walieleza yaliyokuwa na yanayoendelea kuikumba jamii.
Msimamo katika muziki unatofautiana na licha ya kila mmoja kufuata maslahi, wapo wanaoshindwa kuonesha walipo katika kutafuta pesa. Ni ajabu kuwa wasanii wanaangalia nini wananchi wanataka ndio wajaribu kuwa wabunifu na matokeo yake ni kuwa wanakosa msimamo maana kila waendapo wanataka kuiridhisha hadhira jambo ambalo haliwezekani na ni dalili mojawapo ya kuporomoka.
Malipo katika muziki kwa sasa ni mazuri kiasi na naamini ndio maana kunakuwa na mamluki kuliko halisia.
Napenda kusema tena kuwa haya ni kwa asilimia kubwa ya wasanii na najua na naheshimu wale wachache wanaoendeleza kazi njema ya KUBURUDISHA, KUELIMISHA NA KUIKOMBOA JAMII KATIKA YALE YAWASIBUYO.
Hii ni CHANGAMOTO YANGU na ni namna ninavyoliona tatizo la muziki wa nyumbani. Pengine unaliona tofauti nami maana kama lilivyo jina la blogu hii "namna uonavyo tatizo ndilo tatizo"

Blessings

**KUTOKA MAKTABA**

Kwa kuwa amekufa alivyokufa...........

Moammar Gadhafi akiwahutubia wale waliokuwa wakimuunga mkono mjini Tripoli Libya Machi 2, 2011.
Photo Credits: ABCNEWS.COM
Kama kuna jina moja (licha ya matamshi mengi) lililotawala vichwa vya habari katika siku za karibuni ni la kiongozi wa zamani wa nchi ya Libya, Moammar Gadhafi. Na kama ambavyo imeripotiwa kwa vichwa na maelezo tofauti, kiongozi huyu ameuawa na sasa nchi ya Libya yasemekana kuwa "huru".Utawala wa Gadhafi ulikuwa kati ya tawala kongwe zilizopo sasa (miaka 42) na anguko lake limeigawa dunia katika kilichotendea, kilivyotendeka na pengine kitakachofuata. Wapo wanaounga mkono yote matatu, wapo wanaounga mkono moja ama mawili kati ya hayo na wengine wapingao yote.
MAJIBU PEKEE YAKO KATIKA FUMBO MOJA TU....MUDA.
Ni muda pekee utakaoamua ama kuonyesha ama kudhihirisha kama kila kilichosemwa kuhusu Gadhaffi kilikuwa na ukweli.

Ni muda pekee utakaobainisha kuhusu Falsafa zake, imani yake alivyokuwa akiizungumzia, "uroho wake wa madaraka", "upendo" na / ama "ukatili" wake kwa nchi na wananchi wake, nia yake ama kauli za kuiunganisha Afrika na kadhalika.

Ni muda pekee utakaopima UONGO NA UKWELI wa propaganda za wamuungao mkono na wampingao.
Kwa muda wote wa "mlipuko" wa taarifa na habari za kifo chake, kumekuwa na machache ya kuangalia kijacho, na pengine mimi nawe tutembee pamoja kuangalia hili.....
Kwa kuwa amekufa alivyokufa, basi ameacha funzo kwa wengi kuwa YAWEZEKANA. Sina hakina ni wangapi wa wasomaji wangu waliamini kuwa ipo siku ambayo mtu kama Gadhafi atajificha kwenye "karavati" la maji machafu ili kujikinga ama kuulinda usalama na uhai wake? Lakini tumeona hivi karibuni. Na hakika kifo chake kimeongeza "chachu" ya "msako wa uhuru na demokrasia" katika nchi nyingine. Kwa hiyo kifo chake kimekuwa funzo kwa wengine kuwa wanaweza kuanguka, na wengine kuwa wanaweza kuangusha.
Mahala ambapo palitajwa kama maficvho ya mwisho ya Moamar Gadhafi
Kwa kuwa amekufa alivyokufa, wapo watakaopata ujasiri wa kuthubutu zaidi ya kuuangusha utawala. Wapo watakaopata ujasiri wa kukosoa kila kifanywacho na tawala zilizo madarakani kwa muda mrefu. Wapo watakaopata ujasiri wa kuamini kuwa MABADILIKO yako mikononi mwao na wanachohitaji ni nia na pengine "msaada mwema" wa kuwawezesha kufanikisha hilo.
Kwa kuwa amekufa alivyokufa, wapo wanaoona ama watakaoona ushujaa wake. Tayari baadhi ya watu mashuhuri duniani wameanza kupinga hadharani kifo cha Gadhafi na kuonya juu ya kitakachofuata. Kiongozi wa Nation of Islam, Louis Farrakhan amelaani mauaji hayo alipohojiwa na na mtangazaji wa kituo cha WVON-AM Chicago, Cliff Kelley na kusisitiza kuwa “Gadhafi died in honor, fighting for the Libya that he believed in.”
Mtumishi Louis Farakhan akizungumza kwenye kipindi cha redio siku ya jumanne Oktoba 25 ambapo alilaani mauaji ya Gadhafi..
Photo Credits: Chicagotribune.com
Kwa kuwa amekufa alivyokufa, wapo watakaotajirika tena kutoka nchi ambazo hazina mahusiano ya moja kwa moja na mwananchi wa Libya. Nazungumzia watunzi wa vitabu, filamu, waandishi wa historia ya Gadhafi, wachambuzi wa makala mbalimbali (ambao nao hulipwa pesa nono kwa hilo) na wengine wengi. Si tu kwa kuwa amekufa, lakini kwa kuwa amekufa kwa namna alivyokufa na kuanza KUPAMBANISHA historia na mustakabali wa waLibya na Libya kwa ujumla.
Kwa kuwa amekufa alivyokufa, wapo ambao kwa mara ya kwanza watatamani kusoma kitabu chake na kujua alikuwa na lipi jipya (kama lipo) linaloweza kuakisi fikra zake, falsafa zake, na pengine hata kunyambua alilokuwa akipanga kufanya iwapo wote wangeamini katika kitabu hicho cha kijani.
Miaka miwili iliyopita, Gadhafi alifanya mahojiano na Fareed Zacharia wa CNN, na alikuwa na HAYA ya kusema

Kwa kuwa amekufa alivyokufa, tayari kutakuwa na biashara halali na haramu kuhusu yeye, kifo chake na hata kitakachofuata. Tunajua alivyokuwa na misimamo (ambayo si yote ilikuwa mizuri akama ambavyo si yote ilikuwa mibaya), na naamini kuwa kati ya wale watakaofurahia kifo chake ni wale waliokuwa "wamewekewa kauzibe" hasa katika suala la rasilimani.
Kwa kuwa amekufa alivyokufa, wapo watakaoneemeka. Wale ambao watataka kuaminika kuwa NDIO WAKOMBOZI HASA WA NCHI. Wale ambao wanaamini kuwa wanastahili kuwa na madaraka kwa kuwa hakuna mwingine anayeweza KUIKOMBOA NA KUIJENGA LIBYA MPYA ZAIDI YAO. Kifo chake kimekuwa MTAJI wa wengi. Wanaoonyesha kuwa WALIDHAMIRIA NA KUWEZA na kuwa sasa ni wakati wa kutumia nafasi waliyoitengeneza "kusawazisha mambo".Lakini hili halitotokea bila wengine kutaabika. Haimaanishi kuwa wakati wa Gadhafi hakuna aliyetaabika, lakini kama lengo la kumuondoa lilikuwa kuondoa taabu ka ahizo, basi lengo hilo halitakuwa limetimia iwapo watu zaidi watandelea kutaabika. Na wazo la taabu hizi linakuja kutokana na ukweli kuwa (kwa mujibu wa vyomb nukuliwa vya habari vinavyomtangaza Gadhafi kama dikteta) vinaonyesha wazi kuwa hakuna aliyekuwa na madaraka zaidi yake. Kwa maana nyingine hakuna aliyekuwa na uzoefu wa utawala WA LIBYA zaii yake. Tuwaombee maana hili si dogo.
Kwa kuwa amekufa alivyokufa, wapo pia watakaodhihirisha UNAFIKI wao. Ambao wataunga mkono baada ya kuondoka na hata wanaoonekana kupinga kifo chake kwa sababu zisizo na maana.
Gadhafi HAJAFA SANA kuliko wengine anaoshutumiwa kuwaua, na japo yawezekana hajateseka kama wale wanaosemekana kuuliwa na majeshi yake, bado ukweli unabaki kuwa naye amekufa / ameuawa.
Na najua kuwa MENGI YATATOKEA sio tu kwa kuwa amekufa ama kuuawa, bali KWA KUWA AMEKUFA ALIVYOKUFA.
Na huu ni Mtazamo kwa namna nionavyo tatizo. Labda namna nionavyo tatizo ndio tatizo.

Natamani ungekuwepo ukayaona haya

Mwl Julius Kambarage Nyerere. 1922 - 1999
Naangalia uchumi wa dunia unakoelekea na namna mataifa yanavyochukua umiliki wa uendeshaji wa shughuli muhimu za kiuchumi kisha naishi kujiuliza kama hii si sehemu ama aina mpya ya ujamaa?
Nikisoma MAKALA HII napata ka-picha kadoogo kwa mbali kuwa kama Mheshimiwa Baba wa Taifa Mwl Nyerere angekuwepo, basi angeweza kurejea kusema mawili matatu ambayo alishawahi kusema miaka kadhaa iliyopita na ambayo yamekuwa katika hotuba zake na nukuhu zilizopo sehemu mbalimbali.
Angekupweo leo hii angesemaje? Hakuna mwenye jibu sahii lakini kwa kuwa alishaonya kwenye hotuba zake, ninaloweza kuhisi ni kuwa angekumbusha kile alichosema ambacho wengi hawakudhani kuwa kingetimia na ungekuwa wakati wa kudhihirika tena kwa maono yake.
Miaka 12 tangu atutoke, bado unakumbukwa na binafsi natamani ungekuwepo ukanona viongozi wengi wa barani Afrika ambao wanayumbishwa misimamo yao na hata kupindisha ilani zao zilizowapa nafasi ya kuwatumikia wananchi, na kuwa kama hawatambui maslahi ya wananchi wao mpaka WAPANGIWE na mataifa makubwa ambayo baadhi ya viongozi wao hawajui lolote kuhusu nchi hizo.
Natamani ungekuwepo ukaona viongozi wetu wa sasa ambao hawawezi kusimamisha mapigano mpaka watishiwe na mataifa fulani, ama wawekewe vikwazo na fulani.
Natamani ungekuwepo ukaona viongozi wasiothamini uhai wa wananchi wao kwa kuendeleza vita baina ya wanachi wa nchini mwao mpaka waamriwe kuacha na mataifa ya nje.
Ungekuwepo basi ungeona viongozi wanaotumia mwanya wa elimu na mfumo m'bovu wa utawala kujilimbikizia mali kwa jasho la wahitaji (sio maskini) wengi Barani mwetu.
By the way, hayo ni ya Afrika kwa ujumla, ya nyumbani Tanzania yanasikitisha zaidi. Utayasoma kwingine ukipata nafasi.
Ni viongozi wachache tunaoweza kujivunia na ambao msimamo wao unaendelea kuonekana kuwa wazi an usioyumbishwa na "viranja" wa dunia. Wengi wanamjua Mandela kama kiongozi hodari, shupavu na jasiri katika Afrika na wenbgi wanakubaliana na hilo, lakini pia kama alivyosema Mchambuzi na Mwandishi hodari Freddy Macha, kabla ya Mandela alikuwepo Nyerere na ujasiri, uwezo na upeo wake bado unaheshimika miongoni mwa wengi.
KAMA UNAYAONA HAYA NA MENGINE MENGI BASI ENDELEA KUTUOMBEA NA KAMA HUYAONI BASI TWAKWAMBIA YALIYOPO LAKINI KAMA HUTUSIKII, NDIO MAANA TUNAENDELEA KUTAMANI TU KAMA UNGEKUWEPO.

Ulitekeleza sehemu yako na huko uliko PUMZIKA KWA AMANI.

NIONAVYO MIMI. Wapinzani "WAJISEME" kabla "HAWAJAWASEMA"

Wiki hii tumeshuhudia kwa mara nyingine "USHINDWI" katika siasa huko Igunga. Nazungumzia kwenye uchaguzi mdogo wa kujaza nafasi iliyoachwa wazi na Bw. Rostam Aziz ambaye aliamua kujiuzulu nyadhifa zake ukiwemo ubunge. Kwa bahati mbaya, WOTE WALIOSHIRIKI WALISHINDWA (kwa mtazamo wangu) kuifanya siasa kama chombo cha kuihudumia jamii badala yake wakaugeuza uchaguzi huo kuwa NGAZI YA KUPATIA MADARAKA.
Ni harakati hizi zilizoleta mambo mbalimbali kuwezesha harakati za kukwaa madaraka hayo. Tumeshuhudia helikopta, fedha, "majeshi" na kila nguvu zikipelekwa Igunga kwa wiki chache ili kupata KITI hicho cha ubunge. Ni kwa mantiki hii nilipoandika kwenye ukurasa wangu wa Facebook kuwa "Mshindi kashindwa na mshindwi kashinda. Nani ni nani na ni nani aonaye ushindi wa sasa kama ushindwi ujao naye aonaye ushindwi wa sasa kama ushindi ujao? Ni LAZIMA SIASA ZETU ZIWE ZAIDI YA KUSHINDA NA KUSHINDWA. Ziwe UTUMISHI KWA UMMA.
Nasubiri kuona ni wangapi waliokuwa Igunga wiki kadhaa zilizopita watarejea "kuwajulia hali" kabla ya 2015.
Nawaza kwa sauti tuuu!!!!"
Ninalowaza ni kuwa katika uchaguzi huu wa "vuta nikuvute", na ulioshuhudia "MAJESHI" ya aina mbalimbali, ni kiasi gani cha pesa kimetumika huko? Na ni kweli kuwa matumizi hayo yataendana na kasi ya maendeleo kwa wana Igunga? Ni kweli kuwa chama tawala kimeshutumiwa na kutuhumiwa kutumia pesa na kila rasilimali iliyo ndani ya uwezo wao, lakini je, UPINZANI mmefanya nini kusuia hili lisitokee wakati ujao? Sote tumesikia matokeo [kuwa Dk. Kafumu alishinda kwa kura 26,484 sawa asilimia 50.56, mgombea wa Chadema, Joseph Kashindye, alipata kura 23,260 sawa na asilimia 44.32 wakati mgombea wa CUF, Leopard Mahona, aliambulia kura 2,104 sawa na asilimia 4.01.)Stephen Mahui wa AFP (235), Hassan Lutegeza wa Chausta (183), Said Cheni wa DP (76), John Maguma wa Sau (83) na Hemed Dedu wa UPDP (63)]
Ninalowaza ni namna ambavyo MUUNGANO WA WAPINZANI (ambao wote wanaigiza kuwa na nia moja ya kuing'oa CCM) ungeweza kuwa suluhisho (kama sio tishio halisi) kwa chama tawala. Na nia hapa si kukitisha chama kuwtwaa madaraka yake, bali kutisha kuwa kisipowajali wananchi kitakosa ama kupoteza viti vingi.
Ni kwanini hata apataye kura 63 aamini kuwa anaweza kuibadili Igunga peke yake? Kwanini asiwekeze kwenye kuvishawishi vyama kumsomamisha yeye, ama atumie kura zake 63 kuwahamasisha wengine kumpigia mmoja watakayekuwa naye?
UPUNZANI......Mna miaka minne kusawazisha haya. Sote tunajua kuwa upinzani hauko sawa nchi nzima. Ni lazima tukumbuke kuwa kuna baadhi ya sehemu ambapo vyama fulani vyakubalika kuliko kwingine. Ni kwanini chama kisicho na wafuasi wengi mahala fulani kuliko kwingine. Ni kwanini vyama hivi visisimamishe mgombea mmoja kwa mujibu wa kukubaliana walikonako? Ukweli ni kuwa bila muungano hakuna ushindi.
Narejea nilichowahi kusema kuwa "JAPO DALILI ZA MTI KUKOSA MAJI TWAZIONA KWENYE MATAWI / MAJANI, LAKINI WAKATI WA KUTATUA TATIZO HILO HATUMWAGILII MAJANI BALI MIZIZI". Ni ujinga kwa wapinzani kuamini kuwa wanaweza kuleta mabadiliko nchini Tanzania kwa kutwaa nafasi za ubunge na uRais pekee (ambao wote si watendaji wa wananchi nchini mwetu). Naamini ni wakati ambao wapinzani wanatakiwa waanze SAFARI KUELEKEA MASHINANI kueleza sera zao ambazo sina hakika kama wengi wanazijua.
Ni wakati ambao hakuna "danganya toto" ya wasanii, wala kikundi fulani. Hakuna kanga wala kofia wala sukari. Ni wakati ambao utamkuta mtu asiye na munkari wa helikopta ana anayepekeshwa na hisia za kumuona "nyota" fulani. Ni wakati huu ambao wanatakiwa kwenda kwa wananchi KAMA WAO, bila mbwembwe za HELIKOPTA na kwa kuwa kama wananchi na kuwakuta katika fikra tulivu, wataweza kuwaelimisha juu ya kile wanachopanga kufanya, kuhusu ilani zao na mipango yao na kisha itawawia rahisi KUWAELIMISHA NA KUWAELEWESHA wananchi juu ya kile wanachopanga kufanya kwa kutumia ama kupitia sera zao. Na hili ndilo ambalo WANANCHI WANAKOSA. ELIMU JUU YA MAANA, NGUVU NA THAMANI YA KURA ZAO. Narejea kunukuu "status" yangu nyingine kwenye Facebook kuwa "TANZANIA HAITABADILIKA iwapo wananchi hawajui / hawatajua MAANA, NGUVU NA THAMANI YA KURA ZAO. Iwapo hawatajua kuwa KURA NI MAKUBALIANO / MKATABA wa KUSHIRIKI katika kutekeleza (na si kukaa kutekelezewa) ahadi ambazo mgombea amezitoa. Iwapo hawatajua kuwa KURA SIO MAZOEA YA CHAMA na kuwa SI LAZIMA IENDANE NA UANACHAMA BALI SERA ZA MGOMBEA NA MAHITAJI YAO na kuwa wanaweza kumpigia kura mgombea wa chama kingine na hata kuchagua Rais, Mbunge na Diwani toka vyama tofauti KULINGANA NA SERA NA MIPANGO YA KUTEKELEZA MAHITAJI YAO.
Nawaza kwa sauti tuuu!!!!"
Novemba 4 mwaka jana niliandika kuwa AJENDA KUU YA UCHAGUZI 2015 IWE UCHAGUZI 2010. Na sasa ni wakati ambao wapinzani wanatakiwa kukaa chini na KUJIANGALIA UPYA. Kuangalia mipango yao na namna ambavyo wataifikisha na kuielewesha kwa jamii. Kuangalia NIA YAO KAMA WAPINZANI na pia kama vyama vya upinzani, kisha kuchuja washirika na wasio washirika na hapo watapata la kufanya kwa manufaa ya wananchi. Si lazima wao wachukue nchi, lakini "kuwatia jambajamba" watawala itatosha kuwa utumishi. Lakini KWANZA WAMALIZE MGAWANYIKO ULIOMO NDANI MWAO kabla hawajafikiria KUWASEMA WALIO CHAMA TAWALA kwa yale watendayo. Na ndio maana nasema NIONAVYO MIMI. Wapinzani WAJISEME kabla HAWAJAWASEMA

Na huu ni MTAZAMO WANGU kwa namna nionavyo tatizo. Natunza haki zote za kukosea na kukosolewa kwani yawezekana kuwa NAMNA NIONAVYO TATIZO NDIO TATIZO

Tuonane "Next Ijayo"