MAISHA ya sasa. Ni kukimbiza DEATHDAY kuliko kuikimbia BIRTHDAY

Na Mubelwa T Bandio
MAISHA. Nimejifunza kuwa hayako sawa. Na naamini huo ndio usawa wake, kwani humu tuishimo hakuko sawa. Hivyo, haitakuwa sawa kwa maisha kuwa sawa katika "uwanja" usio sawa kwa waishimo.
Na...
Najua nililoanza nalo na nitakaloendeleza halitaeleweka sawa, na huo ni udhihirisho wa usawa wetu, ambao nao hauko sawa.
Leo, Agosti 10,  ninapoadhimisha mwaka mwingine katika maisha yangu, naitumia siku hii KUAKISI maisha yangu kuliko kusherehekea.
UKWELI ni huu...
Unasoma hapa kwa kuwa "umekua" na kufikia umri wa kusoma na kuelewa. Huu ni umri wa kusherehekea ama kuadhimisha siku kadhaa za kuzaliwa kwako.
Na, kama unasoma hapa, jambo moja ninaloweza kukuhakikishia ni kuwa UTAKUFA.
Kwa hiyo, kama wanadamu, haya mawili yanakuwa ya lazima. Ukizaliwa, utakufa. Tofauti ya maisha yetu ipo katikati ya haya mawili.
Kama nilivyowahi kuandika, kuwa UTAKUMBUKWA KWA DESHI YA MAISHA YAKO (rejea hapa)
Maishani, nimehudhuria BIRTHDAY(s) na MISIBA mingi tu, na kote nimejifunza mengi kuhusu maisha yetu ya sasa, tuyatakayo na namna tunavyojitahidi kuifikia TAMATI yetu.
Labda funzo kuu nililowahi kushiriki nanyi ni lile nililoliandika HAPA Agosti 22, 2011 baada ya kuhudhuria msiba wa Dada yetu hapa Washington DC.
Maisha yetu ya sasa yanaonekana kuwa ya mchakamchaka, twayakimbiza matumaini na (katika hali ya kushangaza) hata siku zaonekana kuwa fupi kuliko awali.
Kabla hujajipanga, ni kesho, ni juma lijalo, ni mwezi ujao na mwaka bila kukamilisha mengi uliyoamini ungependa kuyakamilisha katika muda uliojipangia.
Ninapoangalia miaka hii niliyoishi, naiona kuwa mingi sana. Si kwa kuwa nimeishi mingi kuzidi wote, bali kwa kuzingatia ni mara ngapi nimekuwa nikiamini nimefika mwisho wa uhai.
Nakumbuka kusoma makala ya Kaka Eric Shigongo, iliyosema kuuona mwaka mpya ni nafasi ya ziada. Na naamini katika hilo.
Mara kadhaa (na ni zaidi ya moja) nimekuwa kwenye nafasi ya kuona kama kesho ilikuwa mbali na isiyofikika kwangu nikiwa hai. Siku ambayo hunijia akilini zaidi juu ya hilo, ni HII
Lakini leo wasoma niandikalo.
NI NAFASI YA ZIADA katika kuikimbiza "siku ya mwisho"
Nikirejea kwenye kichwa cha bandiko hili,fikra kwamba maisha yetu ya sasa ni kama kuikimbiza kesho kuliko kuifikiria leo na hata jana, kunatufanya tuonekane kuyawaza yajayo kuliko tulikotoka.
Ni hili linalonifanya niamini kuwa, maisha yetu ya sasa yamewekeza katika yajayo. Na kama nilivyoeleza kabla, jambo pekee ambalo sote tuna hakika nalo, ni kifo.
Na ndio maana nikasema, MAISHA ya sasa. Ni kukimbiza DEATHDAY kuliko kuikimbia BIRTHDAY
Anyway!
Nisijesahau kujitakia EARTHday njema.
Japo najua fika kuwa shukrani za maisha yangu nazipokea kwa sababu ni Mungu aliyeniweka hai mpaka sasa. Na ndiye aliyenipa WAZAZI wangu ambao sina ninanloweza kueleza kuhusu nafasi yao maishani ikalingana na walilotenda.
Labda jambo moja tu, kwamba walinibariki na NDUGU ambao uwepo wao umekuwa kama egemeo la kukua kwangu. Hawa ndugu wameniwezesha kuambatana na JAMAA ambao kwa muongozo wa ndugu, wameniwezesha kuwa nilivyo. Si unakumbuka kuwa Twachagua maongezi, maongezi yachagua mawazo na mawazo yatuchagulia jamii? (Isome hapa)
Nina maRAFIKI ambao wananisaidia katika kukua kwangu. Hawa nawajumusha na wale wanajiona kama maadui kwangu, ambao mara nyingi wamenifanya kujitahidi kukamilisha mambo ili wasipate la kusema.
Hahahahahaaaaaaaaaaaaaaaa
Kipekee, namshukuru mke wangu mpenzi Esther na wanangu Paulina na Annalisa kwa kuwa wavumilivu kwenye harakati zangu (nyingine hazielewekagi yaani)
Hahahaaaaaaaaaaaaaa
Ni siku nyingine ya kukumbuka kuzaliwa kwangu. Nalikaribia hitimisho la maisha, na nikilijongelea, najitahidi kukamilisha dhumuni yangu ya kuwa humu duniani.
Mungu akubariki na kuonyeshe namna muafaka ya kutenda kila lililo jema, kadhi uikaribiavyo.
 

Nionavyo mimi..... KiTanzania.....labda atakayepata "Division One" ndiye atayekuwa amefeli zaidi.

 
Wanafunzi wa kidato cha nne wako kwenye mitihani yao ya kumaliza elimu ya sekondari
Wakati watahiniwa hawa wakiendelea kusaka "UFUNGUO WA MAISHA" yao, bado mjadala mkuu nje ya vyumba vya mitihani kuwahusu wao si kuhusu mitihani wanayofanya, bali kuhusu MKANGANYIKO KUHUSU KUFUTWA na kisha KUREJESHWA kwa DARAJA LA SIFURI katika matokeo ya mitihani yao.
Wala sina mpango na hilo, maana SIO TATIZO KUBWA KATIKA ELIMU YETU.
Tatizo kubwa lipo kwa wale wanaosoma, wanachosoma, wanavyosoma na matokeo ya kipimo cha wanachosomeshwa.
Mei 13, 2010 niliandika bandiko lenye kichwa kisomekacho Tunapofelisha kizazi kwa kufaulisha mitihani ambalo ndani mwake kulikuwa na aya zisomekazo "mifumo iliyojengwa na waalimu wetu (ambao yawezekana wamejengewa na waalimu wao) ni kuwa unastahili kupata daraja fulani ili uonekane umefaulu. Na ndio maana msisitizo hauko kwenye kuelewa na kuweza kutumia elimu katika maisha na kutatua matatizo ya jamii, bali ni katika kufaulu mtihani kwa kupata maksi kadhaa.
Tusemeje kuhusu WASOMI wetu wa IDARA YA MAWASILIANO IKULU? Unadhani hawakufaulu? Unadhani kuna sehemu yahitaji watu "waliofaulu" vema kama sehemu nyeti kama hizo? Umeshajiuliza wafanyalo huko? Basi SOMA HAPA ama HAPA uone WAFAULU MITIHANI HAWA WANAVYOLIFELISHA TAIFA KWENYE MAMBO NYETI KAMA MAWASILIANO HUKO IKULU
Na pia nimekuwa nikiona maswali meengi kuwa "kwanini wahandisi wa Tanzania hawabuni vitu vya kuisaidia jamii wakiwa nyumbani" na nahisi hili ndilo jibu lake. Kuwa waandisi ambao wamekuwa na alama nzuri darasani na kutunukiwa vyeti mbalimbali kuonesha UFANISI DARASANI lakini wanapoingia kwenye "ulimwengu wa kazi" inakuwa ni shughuli nyingine kabisa kwani wafunzwacho kwa nadharia hakionekani kuwa halisi kwenye utendaji wao. Ni hapo waajiri wanapoanza kusaka kama waajiriwa wao wana vyeti visivyo halali ama walipata matokeo hayo isivyo halali. Lakini mwisho wa siku ni kuwa WALIFUNZWA KUFAULU MITIHANI NA SIO KUFANIKISHA KAZI WASOMEAZO."
Sasa nikirejea kwenye mjadala wa leo... TUANZE KWA KUANGALIA NAMNA ELIMU YETU INAVYOTUFAA Elimu ya Tanzania imeshindwa kumfanya mTanzania kuitumikia jamii yake kutokana na alichofunzwa ndani ya nchi yake kwa MTAALA wa nchi yake, uliotengenezwa maalum kwa ajili yake.
Kwa ufupi ni kuwa...TUMEJITWIKA UKOLONI na kuwafunza watoto kisicho na manufaa kwao.
Achilia mbali wanachofunzwa...ANGALIA WANAVYOFUNZWA.
Kwa kuwa kifunzwacho hakina mahusiano ya moja kwa moja na mazingira yetu ya kiTanzania, ZAO PEKEE LA ELIMU YETU NI KAZI NA MAZINGIRA YA KIKOLONI.
Elimu yetu haimuandai mtu kuyakabili maisha ya mahala alipo. Na ndio maana mtu anayemaliza elimu yake Rubafu ama huko Kasulu ama Nanjilinji anaweza kuishi vema kwa kubangaiza ndani ya Dar Es Salaam kuliko kule aliko"gradueti"
Umejiuliza kwanini?
Kwa kuwa ELIMU YETU IMEWATENGENEZA WATAHINIWA KUWA TEGEMEZI WA MFUMO WA KIKOLONI.
Na kwa kuwa kifunzwachwo chaweza kutopatikana katika mazingira tuliyopo, mfunzwaji anatumia nguvu za ziada kukielewa.. Na hilo lanirejesha kwenye lile bandiko la awali kuwa katika elimu yetu, "msisitizo hauko kwenye kuelewa na kuweza kutumia elimu katika maisha na kutatua matatizo ya jamii, bali ni katika kufaulu mtihani kwa kupata maksi kadhaa." Na ndio maana, wale wanaofanya vema, si kwamba wanajua yanayoendelea katika jamii ya kiTanzania, bali WALIOJITENGA NAYO KUWEZA KUJUA KISICHO CHAO.
UKWELI NI KWAMBA........
Wale wanaofanya vema ni wale ambao wanatumia muda mwingi kutofanya lolote zaidi ya kusoma / kukariri mambo ambayo HAYATAISAIDIA JAMII YA MTANZANIA MOJA KWA MOJA.
Na......
Wale wenye majukumu na shughuli za kiTanzania wanashindwa kukariri wafunzwalo na mwisho wake wanaonekana wamefeli.
Lakini....
Naamini kuwa YULE ambaye anajihusisha na jamii akingali anasoma, anakuwa na UJUZI NA UZOEFU wa yale yanayoendelea katika jamii. Na kwa "KUJICHANGANYA" na jamii, kuisaidia jamii, kuwa sehemu ya matatizo na suluhisho la jamii....ANAFELI.
Lakini bado tunajua fika kuwa wale watakaomaliza kidato cha nne, ukampata yule wa DIVISION ONE na wa DIVISION V/O kisha ukawapeleka TANZANIANI (namaanisha kule ambako asilimia kubwa ya waTanzania wanaishi) na kuwaweka ukitaka wawe sehemu ya suluhisho la matatizo ya jamii, wale wanaohitaji msaada kutoka kwa waTanzania wenzao, basi UTAGUNDUA KUWA YULE ALIYELAZIMIKA KUJITENGA NA JAMII YAKE ILI AFAULU HIYO "DIVISION ONE" ATAKUWA NA UWEZO MDOGO WA KUMSAIDIA MTANZANIA KUTATUA MATATIZO YAKE.
Ninalomaanisha ni kuwa.....
Kufaulu kwa wanafunzi wetu kunawalazimu wajitenge na masuala ya jamii yetu, wajitenge na matatizo na hata suluhisho la jamii yetu, kwa kuwa MASOMO HAYAAKISI MAHITAJI YA MTANZANIA
Na ndio maana nasema......
Nionavyo mimi..... KiTanzania.....labda atakayepata "Division One" ndiye atayekuwa amefeli zaidi.

Nguvu baina yetu isiyo na nguvu ndani mwetu, yenye nguvu kwetu.

Ndio.

Ni nguvu ambayo twaweza kuitumia japo huwezi kuipima kwa namna tupimavyo nguvu nyingine, lakini inaweza kufanya mengi na kutuepusha na yale ambayo hata kwa nguvu tulizonazo hatuwezi kuyatenda kwa urahisi namna hiyo.
Nazungumzia NGUVU YA KUKUBALI KUELEWA TUAMBIWACHO. Wengine wanaita kusikia lakini kuna kusikia na usielewe kama ilivyo kwa aangaliaye na asione.
Pengine tukiangalia mataifa makubwa yanavyohangaika kupambana na wasiowaona, unadhani wangeweza kukaa chini na kuelewa kile wanachoonywa kabla hawajaingiza miguu huko vitani wangeingia gharama za mali na uhai wa watu kama waingiavyo sasa?
Ama kama "watawala" (na hapa sijasema viongozi maana najua viongozi sasa ni wachache na hawatendi haya) wangesikia kilio cha wananchi na kujitahidi kukamilisha kinacholiliwa badala ya kutumia hilo kuwachuma kwa kuomba rushwa tungekuwa katika hali tuliyopo sasa?
Ama watu wangeelewa wanavyoambiwa juu ya usawa uliopo kati ya watu wa rangi tofauti za ngozi wangeendekeza na kuendelea ubaguzi na matabaka? Na unadhani tungelia tuliavyo kwa kuwa tu ndugu zetu ma-albino wanauawa?
Ama kama kilio chetu kingeweza kufika huko "siasani" unadhani ufisadi ungeendelea kuwa namna ulivyo?
Tukitazama nguvu ya kutoelewa waambiwacho inavyoigharimu jamii, utaona kuwa kuna nguvu kubwa sana ya usikivu na uelewa ambayo inastahili kuheshimiwa japo haina kipimo kama upimavyo nguvu ya "kubeba chuma", lakini ambayo ikitumiwa vema inaweza kuepusha matumizi yasiyo ya lazima ya nguvu zetu na kuepusha usumbufu na hata upoteaji wa maisha ya watu.

 
Tuonane "next Ijayo"

JICHO LA NDANI ni kipengele kinachozungumzia mambo mepesi na yaliyo ndani mwetu, ambayo yakiangaliwa vema na kwa tafsiri ama tafakari njema yanaweza ama ndio suluhisho kwa matatizo yetu. Kwa matoleo yaliyopita katika kipengele hiki, BOFYA HAPA

KENYA: Kwanini nafurahia kushindwa kushinda kwa walioshindwa?

Photo credit: GVLN Rao blog
JIRANI, RAFIKI NA NDUGU ZETU WA KENYA WAMEMALIZA UCHAGUZI WAO MKUU.
Ukweli ni kuwa, katika uchaguzi huu, MSHINDI WA KWELI NI MWANANCHI WA KENYA.
Nani asiyekumbuka msuguano uliotokea katika uchaguzi uliopita?
Nani asiyekumbuka kampeni zilizofuatiliwa kwa kila kauli?
Nani asiyekumbuka VIJEMBE vilivyotawala kampeni?
Nani asiyekumbuka USHINDANI MKUBWA uliokuwepo katika uchaguzi?
YOTE YAMEPITA NA WOTE WAMESHINDA. WALIOSHINDA KUSHINDA NA WALIOSHINDA KUSHINDWA.
Lakini pia tulijua tangu awali kuwa kati ya wagombea 8 waliokuwa wakigombea urais, kulilazimika kuwa na mshindi mmoja. Hii lingetokea hata kama uchaguzi ungerudiwa mara kumi.

 
SASA TUYAGEUKIE MATOKEO
FALSAFA YA MATOKEO (ALIYESHINDA NA ALIYESHINDWA) NI SAWA NA ILE YA MLIMA NA BONDE
Nani asiyejua kuwa "mwanzo halisi wa mlima ni mwisho halisi wa bonde"?
Ama ni nani anayesahau kuwa furaha ya sasa ni akiba ya huzuni ijayo?
Na kuna aliyesahau kuwa huzuni ya sasa ni akiba ya furaha ijayo?
Basi kwa "MANTIKI" hiyo hiyo.... kuna mengi ya kufurahia kwa wale walioshindwa kushinda nchini Kenya.
Kuna mengi ya kujifunza na kuna mengi ya kusahihisha.
Wale wachache walioweza kuweka hisia zao wazi, wamesema kuwa kuna mengi mema na mabaya waliyojifunza.
Wamejifunza kuhusu KUTOAMINI MFUMO na wengine kujua UNAFIKI WA WANANCHI.
Wapo waliojifunza kuhusu namna ambavyo mwananchi anaweka DEMOKRASIA yao kando na kuridhisha matumbo na haja zao za wakati huu.
Ina maana, kuna walilojifunza
Kwa maana nyingine, ni kwamba ili walioshindwa sasa wahakikishe kuwa wanafanikiwa baadae, kuna ulazima wa waliofanikiwa sasa kushindwa baadae.
Na pengine, namna pekee ya wale walioshinda kwa njia zisizo halali kukosa nafasi hizi kihalali, basi kuna haja ya kuhakikisha MFUMO UNAREKEBISHWA NA JAMII INAELIMISHWA.
Ina maana, naamini kuwa KAMA WALIOSHINDA KUSHINDWA AMA KUSHINDWA KUSHINDA WANA UCHUNGU NA KENYA KAMA WALIVYOSEMA, BASI KAMPENI YA KUIELIMISHA RAIA ITAENDELEA MPAKA UCHAGUZI UJAO.
Sasa ni kwanini NIMEFURAHIA "kushindwa kushinda kwa walioshindwa"?
1: Kuna mengi waliyojifunza kuhusu uchaguzi.
2: Kuna mambo mema yatakayoongezeka ifikapo uchaguzi ujao.
3:  Kuna DHIHIRISHO KUWA AMANI YAWEZEKANA na tunasonga mbele.
Baada ya vurugu za uchaguzi uliopita, Umoja wa Mataifa ulimuomba Winston Rodney almaarufu Burning Spear kwenda kufanya ONYESHO LA AMANI nchini Kenya.
Burning, ambaye amechukua jina hilo kwa heshima ya rais wa kwanza wa Kenya huru Mzee Jomo Kenyatta, alifanya moja ya maonyesho makubwa yaliyoshirikisha watu wa makabila yote yaliyohasimiana na hakukuwa na tukio la vurugu.
Aliporejea toka Kenya, akatunga wimbo ONE AFRICA ambamo anasisitiza kuwa "ONLY IF YOU COME TOGETHER IS WHEN YOU CAN GET MORE THAN WAHAT YOU'VE LOST"
Naamini, iwapo wale wote walioshindwa katika uchaguzi huu wataungana kuimarisha KUREKEBISHA KWA NJIA ZA HALI yale yaliyowasababishia kushindwa, naamini uchaguzi ujao utakuwa wa MAFANIKIO ZAIDI
PamoJAH

JICHO LA NDANI ni kipengele kinachozungumzia mambo mepesi na yaliyo ndani mwetu, ambayo yakiangaliwa vema na kwa tafsiri ama tafakari njema yanaweza ama ndio suluhisho kwa matatizo yetu. Kwa matoleo yaliyopita katika kipengele hiki, BOFYA HAPA

Twachagua maongezi, maongezi yachagua mawazo na mawazo yatuchagulia jamii

Photo Credits: Workfromhome.com
Maongezi yanaweza kuwepo katika namna nyingi ikiwemo ile ya kuongea kwa sauti ama yale yaendeleayo kimyakimya akilini mwetu ambayo wengine wanayaita mawazo. Lakini ni mazungumzo haya ambayo huchukua jukumu kuubwa la kutambua mengi na kutambulisha mstakabali wetu. Ni haya yanayorekebisha mienendo yetu, maamuzi yetu, mawazo yetu, hisia zetu na hata matendo yetu. Ni mazungumzo haya yaendeleayo vichwani mwetu ambayo huanza bila hata ruhusa ya muwazaji, ambayo hupelekea matokeo ya aina mbalimbali. Fikiria mazungumzo yanayokuwepo ndani ya kichwa chako pale uonapo kitu upendacho (awe mtu, gari, nyumba, kazi ama chochote). Hili ndilo husababisha mtu kufuatilia ama kupuuzia kile aonacho. Kwa maana nyingine ni kwamba tuna kila uwezo wa kuchagua aina ya mazungumzo yanayoweza kuwa na ushindi ndani ya vichwa vyetu. Hili laweza kwa kuanza kuchagua watu wakuzungukao ambao kwa namna moja ama nyingine wanaathiri mazungumzo yetu ya nje kisha ya ndani. Pia waweza kuwa makini na namna maongezi ndani mwetu yanavyogawanya matukio na umuhimu wa yaliyopita, yaliyopo na yajayo. Lakini pia katika makundi hayo matatu kuna makundi mengine manne ndani mwake ambayo ni VITU, WATU WENGINE, SISI NA MAHUSIANO.
Watu wengi hujikita kwenye kuongelea vitu (kama magari, nyumba, safari, michezo nk) na watu wengine ( kama wanasiasa, watoto, waigizaji, majirani wafanyakazi wenza, watalaka nk) kuliko wanavyojizungumzia wenyewe na mahusiano yao.
Ukweli ni kwamba maongezi tuanzishayo kichwani huchagua nini tutaendelea kuwaza na hiyo hutufanya tuchague watu tunaopenda kushirikiana nao na hiyo yageuka kuwa jamii yetu.

YAKO NI IPI NA WAICHAGUA VIPI? Yangu ni pamoja na wewe unayemaliza kusoma hapa. Nimeamua kuishi na maisha ya mazungumzo chanya, mawazo chanya na hayo yatanifikisha kwenye jamii chanya. Kwa Ujumla naishi uchanya.
Msikilize Nasio anachosema katika Living In The Positive

Kizazi...Nini kipimo chake? Wakati, Mazingira ama Nyenzo?

Photo Credits: Jack Graham Blog
Labda wapo wanaoshangaa kuwa mtu na mzazi wake wanahesabika kuwa watu wa vizazi tofauti licha ya kwamba wote wako hai.
Wengine wanakubali kuwa wao na wazazi na wazazi wa wazazi wao ni vizazi tofauti licha ya kwamba wote wako hai.
Lakini wapo ambao pengine bila kufikiria wanaamini kuwa kila UZAO ni KIZAZI.
Na pia wapo ambao wanaamini kuwa yachukua miaka mingi kutoweka kwa kizazi kimoja kwenda kingine.
Kwani kila siku si tunasikia muziki huu wa "bongo flava" ukiitwa muziki wa kizazi kipya? Hata kama anayeuimba amevutiwa na muziki miaka michache iliyopita baada ya kumsikiliza "mkongwe" ambaye (kwa tafsiri "yao") si mtu wa kizazi chao?
Hujasikia wasanii wakirudia nyimbo za miaka kadhaa iliyopita na kusema wamezirudia katika MUZIKI WA KIZAZI kipya katika harakati za kutenga kizazi cha "remix" na MUZIKI HALISI?
ACHANA NA HAYA....

Juzi tukiwa shuleni katika kujadili KIJANA NA TEKNOLOJIA, binti mmoja akasimama na kuchangia akisema "maisha yangu yote sasa ni elektroniki. Ndio kalenda, kumbukumbu, miadi, barua, simu, sauti nk. Vyote nafanya kwenye simu yangu ya Iphone." Hapo mie nikawa natikisa kichwa kukubaliana naye. Kisha akasema KWA KIZAZI CHA SASA HUWEZI KUISHI BILA NYENZO KAMA IPHONE.
Hapoooooooooooooooo sasa....Sikusubiri "kunyoosha mkono"
Nikamuuliza kuwa anaamini kuwa kila pembe na mtu / kijana wa rika yake anaijua Iphone achilia mbali simu hata ya kukoroga?
Nikamuuliza anaposema KIZAZI CHA SASA anamaanisha katika nyumba, kijiji, mkoa ama jimbo analoishi ama anamaanisha ULIMWENGU MZIMA?Ni kweli kuwa binti huyu wa miaka 18 wa hapa Maryland yupo kwenye kizazi tofauti na binti ya jirani yetu mwenye miaka 18 pale Bushasha? Kama wana umri sawa, si wako kizazi kimoja? Lakini kama hawatumii nyenzo moja kutokana na mazingira, ina maana mazingira ni kigezo? Na je, ni kweli kuwa "Uncle" nanilii anayetumia kompyuta saana pale Bongo atakuwa katika kizazi sawa na haka kabinti ka hapa kwa kuwa nyenzo zainawaweka kwenye "usawa" wa matumizi?
Ndipo nilipopata wazo la kuja kuuliza hapa kwamba KIZAZI....KIPIMO CHAKE NI NINI? NI WAKATI, MAZINGIRA, AMA NYENZO?
Labda nikuonyeshe tu kuwa.....................Hawa hapa chini

Photo Credits: Broadcasting Corporation of China
Ni wanafunzi wa elimu ya awali kama ilivyo kwa hawa hapa chini.

JE!! Japo wanaweza kuwa na umri unaolingana ama kukaribiana, unaamini wako katika KIZAZI KIMOJA?
Kwani kizazi ni nini?
Innocent Galinoma aliuliza "what is life? Is life a gift, or a test, or a punishment for my people?"
MSIKILIZE

JUST THINKING OUT LOUD.
 NB: MARUDIO YA FEBRUARI 23, 2011

Wewe ni ZAIDI YA WEWE

Mimi ni zaidi ya umuonaye pichani. Nawe pia. Isake "nguvu uliyo ndani mwako" utafanikiwa
Maswali ya wewe ni nani yanaweza kuleta mjadala mkubwa na pia kujiuliza kama umefikia kiwango cha juu cha u-wewe nalo laweza kuwa swali gumu. Lakini kuna ukweli kuwa "wewe ni zaidi ya wewe". Niliwahi kuandika kuwa tuko tulivyo kutokana na maisha yetu kutokana na maisha yetu yaliyopita na kwa ajili ya maisha yetu yajayo. Pia Kaka Bwaya na wachambuzi / watambuzi wengine wameandika kuhusu mada zihusianazo na hizi. Kaka Kaluse alishaandika juu changamoto za kufikiri vizuri na hofu ya kesho ilivyo dubwana la kutisha mambo ambayo kwa hakika yanatukwamisha katika kufikiri juu ya uwezekano mwingine wa kujaribu kuwa na maisha zaidi ya haya tuliyonayo.
Lakini ukweli halisi ni kwamba maisha yetu yanakwamiswa na namna tunavyochukulia mafanikio yetu na ama namna tunavyoogopa kusaka mafanikio zaidi ama tunavyoshindwa kuamua kujaribu namna nyingine za mafanikio pale kile tufanyacho kinapogoma. Kuogopa kwetu kujaribu (ambazo ni athari za hofu, fikra mbovu na zenye mtazamo hasi tunazojijengea) ndiko kunakotufanya kushindwa kujipa ama kusaka changamoto zaidi ambazo ni chachu ya ukuaji wa kila mtu. Nakumbuka msemo wa kikwetu usemao "kama hujala nje ya kwenu utaamini kuwa mamako ndiye mpishi bora ulimwenguni" ambao kwa tafsiri ya isiyo rasmi wamaanisha bila kukubali / japo kufikiri na kuangalia changamoto za maisha mengine, kwingine na kwa namna nyingine, utabaki kuamini kuwa umefikika kwenye kilele cha mafanikio yako. Kwa ujumla katika suala lolote, kuna kuona tatizo, kisha kulitambua na baada ya hapo kuangalia kama unataka kupata changamoto na kukua ama unataka kuachana nazo (nikimaanisha kuzikimbia changamoto) na hapo ndipo utakapoamua juu ya kuwa ulivyo, kuporomoka toka ulipo ama kuwa zaidi ya ulivyo.
Ndipo linapokuja suala la UTUMWA WA KIAKILI ambapo mawazo ya "nimeshapitwa na wakati" ama "hizo zi fani zangu" na hata "vina wenyewe" vinapokuja na kujikosesha nafasi muhimu na pengine adimu ya kuwa mtu wa pekee ulimwenguni. Nikimsikiliza Bob Marley anaposema "emancipate yourselves from mental slavery, none but ourselves can free our minds" napata maana halisi ya namna tunavyoweza kuwa zaidi ya sisi kama tutakuwa na fikra chanya juu ya kile tutakacho kutenda.
Kumbuka kila mwenye mafanikio alipitia maanguko mengi na kutokata tamaa ni sifa mojawapo ya shujaa hivyo hatustahili kukata tamaa maana kwa kuendeleza tuaminiyo, tupendayo na tutakayo tutafanikiwa tu. CHANGAMOTO ni sehemu ya maisha na kila uwazapo kitu na kukawa na uwezekano wa mafanikio basi ujue waweza kuwa hapo uwazapo kama utafanya hicho uwazacho kwa njia na mpangilio sahihi.
Ni muda wa kujitazama wewe kama wewe, kuangalia ulipo na kisha kutazama uwezo wako katika utendaji mambo, ndoto zako, na uwezekano wa kuwa zaidi ya ulipo na kisha ujiulize HIVI WEWE SI ZAIDI YA WEWE? Kama ndio basi "fuata ndoto zako"
Labda Luciano atukumbushe kuwa "trade winds will keeps on blowing, my life keeps on going, Jah's Love keeps on flowing. So i never give up my pride".


Jicho la ndani ni kipengele ambacho huangalia mambo kwa "undani" zaidi na kujaribu kutafuta suluhisho kutokana na tafakari ya tatizo. Kwa maandiko mengine kuhusu kipengele hiki, BOFYA HAPA

Pale "KIBAYA" kinapokuwa NGUVU pekee ya kutangaza "UZURI"

MARUDIO YA April 27, 2010
Septemba 14, 2009 niliandika kuhusu suala la kile kiitwacho UBAYA na UZURI na nililonena ni kuwa Hakuna kibaya kisicho na uzuri...... Yategemea umeachia wapi kuoanisha na tukio (jikumbushe hapa) na bado naamini hivyo.
Ukweli wa mambo ni kuwa kile kiitwacho KIZURI chatokana na kutoonekana kuenenda sawa na kile kiitwacho kibaya japo si kila kizuri na kibaya vina tafsiri moja katika jamii husika.
Lakini tuachane na tofauti za kijamii.
Lolote liitwalo baya lina funzo zuri ndani mwake hata kama funzo hilo ni kutukumbusha kuwa WABAYA WANGALIPO.
Takribani majuma mawili yaliyopita nilikuwa nasikiliza kipindi cha mahojiano cha FRESH AIR kirushwacho na Redio ya Taifa ya Jamii (NPR) kinachoongozwa na Terry Gross ambaye amekuwa akifanya mahojiano mbalimbali katika kipindi hicho tangu 1987. Katika kipindi hicho ambacho siku hiyo Terry hakuwepo, yalifanyika mahojiano na Frank Meeink (aonekanaye kwenye jalada la kitabu chake) ambaye akiwa na miaka 13 alianza kujitmbua kama SKINHEAD; kundi la watu wawachukiao watu weusi na wayahudi na (wale wawajumuishao kama) watu wa rangi. Alipofikisha miaka 18, akawa "sauti ya kundi hilo" huku akizunguka nchini akitafuta wanachama wapya wa kundi hilo na pia kuendesha kipindi cha Televisheni huko jimbo la Illinois kwa dhamira hiyo hiyo. Baadae alikamatwa na kufungwa kwa kosa la kuteka na kumpiga saana mwanachama wa kundi jingine la Skinhead.
Kwa mujibu wa tovuti yake, "While in prison he befriended men he used to think he hated, men of different races. After being released from prison, Meeink tried to rejoin his old SkinHead pals but couldn't bring himself to hate those whom he now knew to be his friends." (Anzia Dk 19:10 - 24:42)

AUDIO HII NI MALI YA NPR NA IMECHUKULIWA HAPA
Ukisikiliza kwa makini utagundua kuwa Frank aliamini kuwa alikuwa na marafiki waliokuwa wanawaza mamoja. Na aliamini kuwa watu wa rangi nyingine hawakuwa watu na hakukuwa na namna wala haja ya kuwajali. Ni baada ya kufungwa jela na kukutana na huyo kijana mweusi (wa asili ya Afrika) ambaye alionekana kumjali na kuwaza naye kuliko walivyokuwa wale alioamini kuwa wanamuunga mkono. Na baada ya kutoka jela, alijaribu kurejea kwao na akagundua kuwa UBAGUZI hauna mwisho na hata ndani mwao wakaendelea kubaguana kuhusu "uzungu" wao jambo lililomfanya aichukie "jumuiya" aliyoamini ina umoja.
Ni kwa KUFUNGWA JELA kulikomfanya awape nafasi ya pili ya kuwafikiria watu alioamini kuwa HATOWAPENDA MAISHANI na hata alipotoka na kukorofishana na "wabaguzi" wenzake alimpa nafasi mwajiri wa kiyahudi ambaye naye alibadili mtazamo wake kuhusu wayahudi (anzia Dk ya 24:56-27:10)
Leo hii, FRANK MEEINK anajishughulisha na harakati za kueleza ukweli juu ya UMOJA WETU bila kujali rangi za mwili (jambo ambalo alijifunza kwa mara ya kwanza akiwa jela) na baada ya kuona mwanawe akibaguliwa na wanachama wenzake (anzia dk 20:00-24:49).
Tovuti yake imesema "Frank's life stands for tolerance, diversity and mutual understanding in racial, political and all aspects of society. Frank is truly an inspiration in any time of strife and conflict."
Na ni kwa kutumia NGUVU YA UBAYA WAKE WA AWALI, SASA HIVI ANAONEKANA KUWA NA USHAWISHI MKUBWA wa kuwawezesha vijana wengi wenye mtazamo wa kibaguzi kuwa na TABIA NZURI za kuthamini watu wa rangi zote.
Ni hapa unapoona namna ambavyo kile kiitwacho UBAYA kinavyoweza kuwa NGUVU PEKEE ya kusambaza wema.
BLESSINGS.
Labda tujikumbushe aliyoimba MFALME Lucky Dube aliposema Different Colour, One People


JICHO LA NDANI ni kipengele kinachozungumzia mambo mepesi na yaliyo ndani mwetu, ambayo yakiangaliwa vema na kwa tafsiri ama tafakari njema yanaweza ama ndio suluhisho kwa matatizo yetu. Kwa matoleo yaliyopita katika kipengele hiki, BOFYA HAPA

Ndoto kama hatua...Keep on walking (II)

"May be hoping for a change is a dream, may be life aint as bad as it seems, but if dreaming is the best i can do, then i'll be dreaming my whole life through" Tanya Stephens
Maneno haya ya mwanadada huyu niliyaeleza vema kwenye kipengele hiki hapa. Na kubwa hapa ni kuhusu NGUVU YA KUAMINI NA KUENDELEA KUOTA KATIKA KILE UAMINICHO.
Lakini pia nakumbuka kuwa "kichwa hiki cha post" nilishakitumia katika post hii niliyozungumzia ndoto za Dadangu Lady Jay Dee na zangu pia na kama nilivyosema katika post hiyo, ilikuwa ni MAALUM KWA NDUGU ZANGU WALIOKATA TAMAA YA KUTIMIA KWA NDOTO ZAO.
Katika maisha nimejifunza mengi sana. Na pia nimejifunza kujaribu kurejesha fikra za muunganisho wa matukio ili kuweza kuthamini pale ulipo. Na hili ni tatizo kwa wengi. Watu wengi wameshindwa kuoanisha kilichorokea na kinachotokea sasa na matokeo yake wanashindwa kuwa na FADHILA kwa wale waliowawezesha kufanikiwa walivyo (iwe ni kwa heri ama kwa shari). Niliwahi kueleza HAPA mkasa wa mfanyakazi mwenzangu ambaye nipokutana naye wiki hiyo alinieleza kuwa ANAMSHUKURU MUNGU KUWA HAKUPATA NAFASI YA PROMOTION ALIYOKUWA ANAITAFUTA KWANI KULE ALIKOTAKA KUHAMIA NDIKO WALIKOPUNGUZA WENGI NA WALIPUNGUZA WASIO NA UZOEFU NA KAMA ANGEHAMIA ANGEKUWA HANA UZOEFU WOWOTE. Sura yake ya siku hiyo ilikuwa tofauti na ile aliyokuwa nayo siku aliponiambia kuwa hajapata nafasi aliyokuwa akiiombea. Wakati ule alikuwa na huzuni saana na leo anaonekana kuwa na furaha. Anashukuru Mungu kuwa hakupata nafasi aliyokuwa akijiuliza kwanini ameikosa.
Kuna wengi ambao wako kwenye FANI sahihi lakini wanashindwa kujua ni vipi waboreshe nafasi zao za mafanikio. NA HILI NDILO NINALOTAKA KUZUNGUMZA LEO.
Jana, nilipata nafasi ya kumhoji Dr Donald Thomas. Mhandisi na mwana-anga mstaafu wa NASA ambaye amefanya kazi hapo kwa miaka 20. Na katika miaka hiyo, amekwenda safari za kwenye space mara nne na sasa ni mkurugenzi katika chuo kikuu cha Towson hapa Marekani. Nilikutana kwa mara ya kwanza na Dk Thomas miaka 3 iliyopita ambapo alikuja kazini kwetu kutushukuru kwa kazi tunayofanya ambayo ilikuwa ni muhimu kwa kuwasafirisha kwenda kwenye space. Katika mazungumzo yake akatoa historia yake na namna ambavyo ALIHANGAIKA NA KUVUMILIA kabla hajapata nafasi ya kufanya kile alichokuwa akikipenda zaidi. Ilimchukua miaka 9, alituma maombi mara nne, akaamua kuchukua madarasa ya urubani, scuba diving, kufundisha, kuongeza elimu na mengine ili kufanikisha kile alichotaka kufanya japo hakukuwa na uhakika wa hilo. Lakini aliamini katika atendalo. Habari hiyo ilinivutia saana nikaona nimualike kwenye Club yetu chuoni aweze kuzungumza na kuwahamasisha wanasayansi watarajiwa, na mwezi march mwaka 2009, alikuja chuoni na kuzungumza nasi. WATU WAKAPENDA NA KUJIFUNZA
Dr Thomas nami March 4, 2009.
Baada ya mazungumzo hayo, nilitamani saana kushirikisha wenzangu katika alichozungumza, lakini kwa bahati mbaya SIKUWEZA. Ni kwa kuwa mengi ya aliyozungumza sikuyakumbuka kwa usahihi hivyo nikaona NI VEMA KUMTAFUTA, KISHA NIMREKODI NA KUWEZA KUSHIRIKIANA NA WAPENDWA HAPA. Nilijaribu kiasi (unakumbuka HII POST?) lakini bado haikuwa rahisi. Nikaona njia sahihi ni kumpata na kumrekodi. Tangu katikati ya mwaka 2009 nimekuwa nikiwaza na kujaribu hili, lakini haikuwa rahisi, mpaka JANA (Nov 29, 2011) nilipoweza kumpata kwa mahojiano naye. Na sasa, nikiwa kama mwandishi mwanafunzi, niliweza kujua mengi ya kujiandaa na namna ya kumfanya aeleze mengi zaidi niliyotaka, nilivyotaka na kwa jamii ninayotaka kuigusa. Hili likawa UTHIBITISHO mwingine kuwa KUNA KILA SABABU KATIKA KILA KITOKEACHO. Nikimhoji Dr Donald Thomas Jumanne Nov 29, 2011
FUNZO HAPA NI KUWA kama ningemhoji mwaka niliopenda mimi, pengine nisingepata niliyopata jana, na kama yeye angepata nafasi ya kuingia NASA alipotuma maombi kwa mara ya kwanza, basi yawezekana asingekuwa bora kama alivyokuwa baada ya kuongeza elimu, ujuzi na mengine ili kujiweka sawa. Na mwisho, ni mimi ambaye sikukata tamaa kumtafuta kwa miaka miwili na nikampata na kuongea na yeye kwa kuwa HAKUKATA TAMAA kwa miaka 9 aliyokuwa akisaka nafasi ya kujiunga na NASA na nilipomuuliza wito wake kwa wanafunzi wachanga anasema WASIKATE TAMAA. Akawa kama anahimiza nilichohimiza kuwa USIKATE TAMAA.
Na kwa wewe msomaji, ambaye kwa miaka mingi umekuwa na ndoto ambayo pengine inaonekana kutokamilika.
Kama unachopenda kufanya ni halali na chema, na kama ni mapenzi halisi na ndoto ya maisha yako, basi kabla hujakata tamaa na kuachana nacho, angalia waliofanikiwa kwenye fani ama kazi uitakayo wana SIFA gani ambazo wewe hujakamilisha? Angalia unaweza kujiboresha vipi ili ufanikiwe, na kisha ongeza TALANTA uliyojaaliwa ndani mwako, UTAFANIKIWA.
Na ndio maana narejea kwenye kichwa cha post kuwa NDOTO NI KAMA HATUA.....KEEP ON WALKING
Sikiliza sehemu HII fupi kati ya saa moja la mahojiano yangu na Dr Donald. Nimeweka sehemu ya HISTORIA, HARAKATI ZAKE KUJIUNGA NA NASA, ALIVYOKATA TAMAA BAADA YA KUONA AMEKOSA NAFASI HIYO, HISIA ZAKE SIKU ALIPOPATA na mwisho WITO WAKE KWETU.
FURAHIA UKIJIFUNZA

Na ukitaka kutazama mission moja kati ya nne alizokwenda Dr Don, tazama video hii iliyoeleza kwa ufupi safari yao hiyo.

USISAHAU KUKOSOA / KUSHAURI uaminipo pana kosa ama kuhitaji ushauri. Nathamini saana hilo na ndio njia pekee ya kuniboresha.

Neno la Dada Joyce na CHANGAMOTO YA MAISHA yetu

Dada Joyce Mshana-Collins akiwa pembeni ya picha iliyowekwa saini, ya rafikie wa muda mrefu Marehemu Kidee Bendera. Hii ilikuwa baada ya misa ya kumuombea Kidee iliyofanyika Jumamosi Aug 20 katika kanisa la Calvary Lutheran Church, Silver Spring, MD.
MAISHA. Nimejifunza kuwa yana kazi ama nia moja tu. KUFUNZA. Na ni kufunza kwafanyika kwa njia mbili, KUFUNZA NINI LA KUFANYA ama NINI LA KUTOFANYA. Na mafunzo haya ni ya "kutwa-kucha". Lakini sote twajua kuwa huwezi kujifunza kama hujaamua na kuwa tayari kujfunza. Niliwahi kuandika na kuuliza mambo kadhaa ambayo nitakuja kuyarejea kuhusu maisha yetu sisi bin-adamu na wale tuwapendao.
Jumamosi ya juzi nilihudhuria Misa ya kumuaga Dada yetu mpendwa Kidee Bendera-Tazani ambayo kwa hakika ilikusanya watu wengi na niliweza kuonana na wengine ambao kwa miaka kadhaa tumeshindwa "kukutana kwa hiari". Nikawaza mengi juu ya MAISHA yetu na hata 'UHIARI WA LAZIMA' tulionao maishani mwetu. Mengi yalitendeka (kama ilivyo katika taratibu za misiba) na mengi yalisemwa. Ila jambo ambalo ningependa kushirikiana nanyi hapa ni MANENO MACHACHE yaliyokuwemo kwenye barua aliyoandika Dadangu Joyce Mshana Collins kwa rafikiye wa miaka mingi sana, Marehemu Kidee. Dada Joyce ambaye alijuana na marehemu kwa takriban robo karne, alitukumbusha sote kuwa binadamu tunadhani fulani amekufa nasi tunaishi, japo ukweli ni kuwa wenzetu wanaanza kuishi wakati sisi ndio tuko kwenye utaratibu wa kufa. Hii ilikuwa changamoto kubwa kwangu (na naamini kwa wengi pia) maana binadamu tumekuwa na desturi ya "kuwaza kinyumenyume" hata pale tunapojua ukweli wa tuwazacho. Nilishawahi kutoa "mfano wa BIMA YA MAISHA ambayo licha ya ukweli kuwa ni BIMA YA KIFO, bado hakuna anayetaka kukubali ukweli na kuiita hivyo. Kwao ni BIMA YA MAISHA ambayo huitumii maishani bali ukifa."
Nawawaza "waamini" na "waumini" wenzangu ambao tuna imani na MAISHA BAADA YA KIFO lakini tunashindwa kukubali ukweli kuwa ni sisi wenye shaka kwa kuendelea kung'ang'ania maisha yaishiyo na kusahau ama kupuuza maisha tuaminiyo. Aliyoongea Dadangu huyu sio tu yalinifanya niwaze mara mbili kuhusu ukweli wa kila tufanyacho, bali hata tuishivyo.
LABDA ni kwa kupuuza hili, watu wanataka "kutanua" hapa duniani.
LABDA ni kwa kupuuza hili, watu wanalimbikiza mali hapa duniani.
LABDA ni kwa kupuuza hili, watu wanakosa heshima kwa binadamu ambaye mbele ya Mungu watakuwa na kuishi maisha sawa na usawa.
LABDA ni kwa kupuuza hili, watu wanathamini maisha ya sasa zaidi ya yale waaminiyo wajayo.
LAKINIIII.....Swali larejea palepale kwamba ni kwanini binadamu ajuaye haya bado hataki kuishi katika ukweli? Je ni ubinafsi kama nilioulizia HAPA?
NI MAISHA ninayotaka tuyaangalie kwa JICHO LA NDANI ili kuweza kujitambua (kama nilivyoeleza HAPA) na kuishi katika KWELI.
Kauli ya Da Joyce imenirejesha kwenye sehemu ya wimbo wa Winston Hubert McIntosh aliyeuliza kwanini wote twataka kwenda mbinguni lakini hakuna aliye tayari kufa? Bado tutarejea alipoeleza Dadaa kuwa tunajali kipoteacho na kupuuza kidumucho.
Nikirejea nilipoanzia, kuwa MAISHA NI MAFUNZO, na kama umeamua kuwa makini, katika kila kitendekacho utakuwa na moja ya chaguzi mbili za kujifunza, NINI CHA KUFANYA ama NINI CHA KUTOFANYA. Binafsi, neno la Dada Joyce limeboresha mtazamo wangu kuhusu maisha, na naamini kama utachukua muda wako, na kutafari alichosema, utakuwa na jibu la swali la NINI MAISHA HAYA YANAMAANISHA KWAKO. Na kwa kuTAMBUA hilo, itakusaidia kujua ni vipi uishi na kwa kuishi kwako, ndipo utakapotimiza LENGO LA KUISHI WAKATI UKIPUNGUZA UISHI ILI KUWEZA KUELEKEA KWENYE UISHI.
Neno ni kuwa, binadamu tunadhani fulani amekufa nasi tunaishi, japo ukweli ni kuwa wenzetu wanaanza kuishi wakati sisi ndio tuko kwenye utaratibu wa kufa.
Na hili ni wazo la jambo, jambo lililoonwa kwa "jicho la ndani"
Luciano anasema, SERVE JAH

UWE NA WIKI YENYE BARAKA, YENYE KUANZA KUUTAMBUA MWANZO WA MWISHO WA MAISHA YAKO, UTAKAOANZISHA MAISHA YAKO.

Jicho la ndani ni kipengele ambacho huangalia mambo kwa "undani" zaidi na kujaribu kutafuta suluhisho kutokana na tafakari ya tatizo. Kwa maandiko mengine kuhusu kipengele hiki, BOFYA HAPA

Natamani kuwa Mwalimu, shule iwe BUNGE na wanafunzi ni waBUNGE

Ingenichukua muda kusahihisha Homeworks, lakini wote wangefanya VEMA, TANZANIA ingekuwa sehemu bora ya kuishi kuliko ilivyo sasa.

Napenda "old style" ya ualimu. Ile iliyonikuza na kunisomesha. Ile waliyokuwa wakiifanya waalimu kama Baba yangu ambapo walimu walikuwa wanajua uwezo wa takribani kila mwanafunzi. Walikuwa wanahakikisha kuwa kila mtu anafanya "homework" yake na walikuwa wanasahihisha siku inayofuata. Walimu walikuwa na uwezo wa kutambua kama umefanya mwenyewe homework yako ama umefanyiwa. Halafu kingine nilichokuwa napenda ni ile style ya kubandika matokeo darasani. Yaani kujua nani kawa wa kwanza na nani wa mwisho. Hapo ilikuwa ni lazima usome sana maana ni kuangalia nani ana VEMA nyingi na nani anaongoza darasa. Lakini kwa mtazamo wangu ilikuwa na faida maana yaliyotendeka ilikuwa ni CHANGAMOTO KWETU kuongeza juhudi katika masomo.
Style hii ningeipata nikaweza kuitumia katika BUNGE LA TANZANIA naamini ingesaidia saana. Yaani kuhakikisha kila m'bunge anapoondoka bungeni baada ya kusanyiko haelekei "kutumbua" pesa alizofanya, bali anapewa "homework" ya kufanya jimboni mwake na akirejea kwa "darasa" (kikao) kijacho kwanza ninaangalia nani kafanya nini na kafanikiwa mangapi kisha tunasonga mbele. Yaani kujua nani anajua na kutatua matatizo ya jimboni mwake na kuwasaidia wananchi wake na pia tungejua nani hana ajualo kuhusu shida na mahitaji ya wale awaongozao. Ingetuwezesha kujua nani yuko mstari wa mbele kubadilishana mawazo (pale nitakapowapa group discussion ya kukokotoa maswali) na kutumia "ideas" za wenzake kufanya homework zake kuwasaidia wananchi wake. NINA UHAKIKA kwa mfumo huu lazima TANZANIA YANGU ingekuwa hatua kadhaa mbele kuelekea kwenye mafanikio ya kutatua shida za wenye uhitaji. Lakini licha ya kuwapa hizo "homeworks", wangepewa jukumu la kusaka mahitaji ya wahitaji ambao kwa bahati mbaya wameonekana kujisahau kuyaweka bayana KAMA NILIVYOULIZA NA KUELEZA HAPA. Lakini pia nigejaribu kuwashawishi "maafisa elimu" kuhakikisha MCHUJO WA KUJIUNGA NA SHULE (uchaguzi) unafanyika kwa nyakati tofauti kwa faida na sababu nilizozieleza HAPA
Nimewaza hivi kwa kuwa kuna wakati nawaza kinachowapeleka "wanafunzi" hawa bungeni nashindwa kuelewa. Nashindwa kuamini kama wabunge hawa ndio waliokwenda kwa wananchi na kuomba kura wakiahidi mambo kedekede na kisha KUPOTEA.
1: Iko wapi nguvu ya wananchi kushinikiza m'bunge wao kuishi jimboni?
2: Kwanini katiba isishinikize m'bunge kuwa na kiwango cha chini cha kuishi jimboni mwake kila mwaka? Wapo wabunge ambao wanaenda majimboni kwa nadra sana.
3: Kwanini katiba isishinikize mikutano ya wabunge na WANANCHHI KATIKA SEHEMU ZOTE ALIZOOMBA KURA kabla na baada ya kuhudhuria vikao vya bunge?
4: Kwani wanapokutana bungeni huwa wanasema mahitaji ya jimbo mwao KWA MUJIBU WA NANI? Wao ama wananchi?
5: Wanapoondoka bungeni huwa hawapewi majukumu ya kutekeleza? Ama wakipewa wanaweza kuyatekeleza bila kuwaeleza wananchi? Lakini kama ni majukumu kwa wananchi si tungeona mabadiliko huko tuliko? Namaanisha hata kama hatuambiwi si tungejua kuwa "ujenzi wa hizi zahanati ni manufaa ya m'bunge kwenda kwenye kikao / vikao vya mwaka huu? Kuna mwananchi anayeweza kujibu akiulizwa amenufaika nini na m'bunge wake kwenda kwenye vikao vya kila mwaka.
Sisemi hatujanufaika, (japokuwa sisemi kuwa tumenufaika), ila kama manufaa hatuyaoni bayana na hatuambiwi pia, sijui tufikirieje matumizi ya kodi zetu?
KAMA MWALIMU, ningehakikisha MASWALI YAJIBIWA na HOMEWORKS ZINAFANYWA na naamini mwisho wa muhula NINGEBANDIKA MATOKEO na pia kuyatuma kwa wazazi (wananchi) ili wajue maendeleo ya wanafunzi na kujua nini cha kuwafanya katika muhula ujao wa shule (mhula wa uchaguzi).

Anyway, japo kuna ukweli ndani yake, lakini nafikiri hii ni njozi.
Never Mind!!!

Jicho la ndani ni kipengele ambacho huangalia mambo kwa "undani" zaidi na kujaribu kutafuta suluhisho kutokana na tafakari ya tatizo. Kwa maandiko mengine kuhusu kipengele hiki, BOFYA HAPA

Si tatizo iwapo utaliangalia toka "pembe nyingine"

Wengi wenu mmeshuhudia UKIMYA niliokuwa nao mtanmdaoni. Tatizo kubwa lilikuwa ni MTANDAO. Na kwa juma zima nikahangaika na "provider" wangu kuweza kunirekebishia tatizo bila mafanikio.
Alipofanikiwa kurekebisha tatizo, akasema "kutokana na siku ambazo hukuwa na huduma, hatutakulipisha gharama kwa wiki nzima. Hivyo ankara yako ijayo itapunguzwa dola 21".
Fikra za awali zilikuwa ni kughafilika kwani niliwaza huyu "huyu mtu hajui ni kiasi gani nimeshindwa kuwasiliana na watu wangu, na anadhani thamani yake ni dola 21?"
Lakini muda mfupi baadae nikaliangalia "tatizo" toka pembe tofauti na nikagundua kuwa wamegawanya ankara yangu ya mwezi kwa siku nilizokaa bila huduma wakapata gharama hiyo, hivyo ndio gharama halisi.
Na badala ya KUKASIRIKA KUWA WANANIREJESHEA DOLA 21, ni vema nikafarijika kuwa NINALIPA DOLA 21 KWA JUMA ZIMA.

NILILOJIFUNZA ni kuwa badala ya kukasirika kuwa nimepunguziwa kiasi kidogo cha dola 21, ninaweza kumshukuru Mungu kuwa gharama ya mawasiliano ya simu na internet kwa siku zote nilizokosa ni dola 21. Hii ilinifanya nione kuwa si tatizo. Sio kwa sababu lilitatuliwa, bali kwa kuwa nililiangalia kutoka PEMBE NYINGINE. Na hilo limenifanya nitambue kuwa katika mengi tuonayo, yawezekana SI TATIZO IWAPO TUTAYAANGALIA TOKA "PEMBE NYINGINE"

Ndoto kama hatua...KEEP ON MOVING

MAALUM KWA NDUGU ZANGU WALIOKATA TAMAA YA KUTIMIA KWA NDOTO ZAO.
Katika siku zilizopita, niliwahi kuandika nikiuliza kuwa UNA UHAKIKA NI NDOTO SI UFUNUO? (irejee hapa) na hapo nilijaribu kuangalia "mstari mwembamba" baina ya ndoto na ufunuo. Lakini pia nimekuwa SHAHIDI wa kile ambacho nimekuwa nikikiona kama NDOTO lakini kikaja kutimia.
Lakini kabla sijaja na yangu, nianze na ya Dadangu Judith Wambura a.k.a Lady Jay Dee. Nilisoma kwenye gazeti alipotoa albamu ya BINTI akisema kuwa alipoenda kwenye Kora Music Awards punde baada ya kuachia albamu yake ya MACHOZI, alimpa Oliver Mtukudzi aisikilize naye akamshauri kurejea kwenye ala za asili (kama sio ala halisi) na kutotegemea vinanda katika kila kitu. Na matunda tukayaona. Mika Mwamba na P-Funk wakashiriki kutengeneza albamu ya Binti (nyimbo tofauti) wakichanganya ala za kina Andy Swebe na wengine. Kwa ujumla albamu ya Binti ilinoga.
Kisha nikaja kusoma nia ama hamu ya Judith kusimama jukwaa moja na Oliver Mtukudzi kufanya kazi. Na Juni 20 NIKASOMA HAPA jinsi ambavyo walisimama jukwaani na kufanya onyesho moja.

Picha kwa hisani ya Lady Jay Dee
Na zaidi nilifurahishwa na post hii kwenye blog ya Jay Dee kwamba amemshirikisha Oliver Mtukudzi kwenye wimbo wake mpya MIMI NI MIMI.
Huu ni uthibitisho mwingine kuwa UKIOTA, UKAFANYIA KAZI NDOTO ZAKO, UPO UWEZEKANO ZIKATIMIA.
Lakini hili si jambo geni kwa wengi. Labda hatuko makini kuhusisha nia zetu na matokeo yake (kama nilivyowahi kuandika HAPA)
Nakumbuka mwanzoni mwa miaka ya 2000 nilikuwa nikisikiliza Times Fm. Muda nilipofungua tu kituo nikakutana na sauti ya Violeth Mzindakaya (Sister V) na kusikiliza kipindi chake. Nikakipenda na kuvutiwa nacho. Nikawa mfuatiliaji wake nikitamani siku moja kufanya kipindi kama chake ama pamoja naye. Lakini baadae "akapotea". Nikasikia kuwa alibahatika kupata mwana. Nikamtumia kadi ya hongera kisha kumwambia kuwa NATAMANI SIKU MOJA NIFANYE NAYE KAZI.
Wakati huo sikuwa hata na "idea" ya namna studio ilivyo (achilia mbali inavyofanya kazi). Miaka miwili baadae tulikuwa tumekaa kwenye studio nikamuuliza kama anakumbuka kadi yangu niliyosema natamani kufanya naye kipindi. AKAKUMBUKA NA KUSHANGAA. Adolph Mbinga (Chinga One), Violeth Mzindakaya (Sister V), Mubelwa Bandio (Nicknameless) na Rogert Hegga (Katapila)
Wakati huo tulikuwa tukifanya kipindi pamoja.
Lakini wakati nikifanya na Sister V, tayari nilishakuwa mshiriki katika vipindi vya SUNRISE, Michezo na pia MATUKIO YA WIKI.
Katika kuandaa vipindi hivyo, nikakita zaidi kwenye ZA KIMATAIFA. Huko nikawa nasikiliza Idhaa za nje kuona wanavyojipanga ili nami niboreshe kazi. Na nikapendezwa zaidi na Idhaa ya Kiswahili ya Sauti ya Amerika. Nakumbuka mwaka 2002 nilianza kuwaandikia barua pepe kuwaeleza ninavyovutiwa na kazi zao na kuwaeleza ninavyotamani kuja kukaa meza moja nao nikifanya kazi pamoja nao. ILIKUWA NDOTO.
Kwa wakati huo sikuwa na ndoto wala njozi za kuja Marekani na hata sikuwa katika fani ya habari. Nilishajikita kwenye UHANDISI.
Lakini wiki kadhaa zilizopita nilipokuwa namalizia mazoezi yangu ya vitendo pale VOA, nikawa katika mazungumzo na baadhi ya watangazaji wa pale. Kati yao ni Kaka Vincent Makori na Dada Esther Githui-Ewart ambao wote niliwauliza kama wanakumbuka barua pepe zangu za mwaka 2002 nilipokuwa nikieleza ninavyotamani kufanya nao kazi? Well!! Wakati huo, Kaka Vince alikuwa ni mwelekezi wangu wa shule kwenye suala la sauti, Dada Esther alikuwa mhariri wa zamu
Dada Ndimyake Mwakalyelye, mimi na Kaka Vincent Makori. Hosts wa InFocus ya VOA
Na bado nilikuwa nikifanya kazi na kina Mkuu wa Idhaa Mwamoyo Hamza, Abdushakur Aboud na Khadija Riyami ambao wote niliwaandikia wakati huo, na pia nyongeza ya Mary Mgawe, Mkamiti Kibayasi, Sunday Shomari na Aida Issa.
Da Aida Issa, mimi na Sunday Shomari punde baada ya kipindi cha KUMEKUCHA AFRIKA
Ninalomaanisha hapa ni kuwa LICHA ya kubadili mazingira, licha ya kuchukua muda mrefu, na licha ya kuendelea kupita njia nyingine mbalimbali, bado TUNATAKIWA KUENDELEA KUAMINI KATIKA KILE CHEMA TUAMINICHO kwani NDOTO NI KAMA HATUA.....NASI TWATAKIWA KUENDELEA KUSONGA.
Miaka 9 baadae nimekaa meza moja na kufanya kazi na wale ambao nilitamani kufanya nao kazi. Kabla HATUJAKATA TAMAA, KABLA HUJAJIAMINISHA KUWA NDOTO YAKO HAIWEZEKANI....JIPE MUDA. Kwani NDOTO NI KAMA HATUA. Hivyo......KEEP ON MOVING
Na kwa hakika nimefurahia muda wangu ndani ya VOA, na bado kuna "NDOTO NYINGINE NILIZOOTA" nikiwa hapa. Na kama ambavyo sikukata tamaa wakati naota ndoto zilizonifikisha hapa, sitakata tamaa kutimiza na hizi ninazoota sasa. Kwani naamini kwamba NDOTO NI HATUA......NAMI NAENDELEA KUZIPIGA.
Sikiliza hapa ushiriki wangu katika jumatatu ya mwisho ya awamu yangu hii ya kwanza "kazini" pale.

Pale teknolojia inapotubadilishia tafsiri ya maisha

Taswira toka University of Sydney Prometheus Research Team
Kuna tafsiri pana sana juu ya suala zima la URAFIKI.
Na kila mtu aweza kuwa na namna anayotafsiri, lakini mwisho wa siku, yaonesha tafsiri zoote nilizokutana nazo zahusisha KUJALIANA KWA WATU AMA PANDE HUSIKA. Ina maana yajumuisha kuwa na wakati maalum na wa kutosha wa kujitolea kwa yule uaminiye kuwa rafiki yako. Katika wimbo wa FRIENDS ulioimbwa naye Beres Hammond ambaye alizungumzia suala zima la urafiki, alisema "friends don't mean a thing if when I'm down you keep me down. Friends don't mean a thing, if I can't cry on your shoulder".
Sasa tunapozidi "kuendelea" tunaona namna ambavyo tafsiri za vitu mbalimbali vyabadilika. Oktoba 6, 2008 nilibandika toleo lenye kichwa cha habari Inapotafutwa maana mpya ya kifo kukidhi mahitaji ya afya (Irejee hapa). Yote ilikuwa katika kuangalia namna ambavyo MAENDELEO na sasa TEKNOLOJIA zinakotupeleka.
Leo nimepita kwenye ukurasa wangu wa FACEBOOK na kukuta nina marafiki 231. Nikawaza ninawasiliana na wangapi na ni wangapi ambao hata nikiandika kwenye "wall" zao wananijibu? Nina desturi ya kuwajulia hali wale ambao hawajawasiliana nami mara kwa mara na ambao hatuwasiliano kwa namna yoyote ile (ikiwa ni pamoja na kutembelea na kuacha maoni kwenye blogs zao), lakini bado nikagundua kuwa wapo ambao tangu wametuma "mwaliko" wa urafiki hawajajisumbua kujua maendeleo mengine ya "rafiki" yake mimi. Pia nikagundua kuwa wapo ambao nami sijawajibika kuwasiliana nao kama ambavyo ningependa.
NIKAJIULIZA...KWANINI SIWASILIANI NAO NA BADO NAWAWEKA KWENYE KUNDI LA RAFIKI?
Ni kweli kuwa wale tulionao kwenye rodha ya tuwaitao "marafiki" wanastahili kuitwa MARAFIKI?
Hivi tunajua WAJIBU WA RAFIKI? Tunajua TUNACHOTAKIWA KUFANYA KWA YULE TUNAYEMHESABU KUWA RAFIKI KWETU? Tunatekeleza kila tutakiwalo kutekeleza kwa wale tunaowaita marafiki?
Katika wimbo huu usindikizao hapa chini, Beres ameanza kwa kumuuliza kila ajionaye kuwa rafiki (nami nakuuliza wewe kuwa)
"Friends, what are you supposed to do? Should you build me up or break me down?
Friends what are you there for, if in my needs you're never around.
Friends what are your duties? Doesn't mean loyalty? Tell the truth even if when hurts, no matter what it may be.
Cause I got my problems and you know that I got them but still you say nothing though you know I'm hurting. Half way smiling when something is hurting and you're keeping the solution...friends don't mean a thing if when I'm down you keep me down. Friends don't mean a thing, if I can't cry on your shoulder"
Usikilize kwa umakini na kwa urefu / Ukamilifu hapa chini nawe ujiulize kuhsu URAFIKI

Tujiulize mengi katika kile tuaminicho kuwa ni MAENDELEO na hiki kiitwacho TEKNOLOJIA. Tuangalie namna ambavyo kwa mwendokasi wa kipekee, tunajipoteza kwa kufuata mfumo wa kile tuonacho kwenda na wakati.
Tujiulize MAJUKUMU yetu kwa wale wawasilianao nasi na kujua kama tunahitaji kuwa nao wote ama tuwe na wachache wanaotusaidia katika kukua kwetu na kukuza fikra zetu.

Ni CHANGAMOTO tuu katika kuyaangalia mambo kwa kile ambacho Dadangu Mija alikiita JICHO LA NDANI

What if we "what if(s) positively? (II)

Pengine swali la kwanza ni "What if Mubelwa angeandika heading hii kwa kiswahili?" Na ningejibu kuwa yawezekana usingevutiwa nayo, AMA isingeweza kuleta maana nitakayo, LABDA usingethubutu hata kusoma maana yawezekana umeshtushwa na kichwa hiki cha habari au YAWEZEKANA unasoma kwa kuwa unataka kuelewa yamaanisha nini kwani ni kama haieleweki.
SAAAFIII.
Ndilo lengo kukufanya usome maana ukiangalia uwezekano wa maswali mengi, utagundua kuwa yatakuwa ni "negatives" zaidi.
Lakini hapa lengo si kueleza sababu ya kichwa cha habari. Hapa nataka kuuliza mawili matatu juu ya hali halisi ya utata ambayo imekuwa ikituyumbisha katika maisha yetu. Ni ile hali ya kuogopa na kuhisi kitu kisicho cha mafanikio kitatokea katika kile ambacho mtu anataka kufanya. Kuwa na ile hali ya kutanguliza kushindwa katika mipango mipya na ni hali hiyo ambayo inatukatisha tamaa na kutukwamisha wengi. Kuna mtu aliniambia "your mental picture will determine your actual future" na ni katika hili tunapojijengea maanguko kwenye mipango yetu mipya kwa kuuliza "what if" isipofanikiwa? Labda tujiulize ni mara ngapi tumetaka kufanya kitu kisha tukaamua kuacha kwa kuambiwa hatutafanikisha ama kujiambia wenyewe "itakuwaje nisipofanikisha?" Tusilojua ni kuwa kwa kutofanya ama kuanza kufanya vitu hatutakutana na CHANGAMOTO zilizo muhimu katika kukua, kukomaa, kupevuka na kuendelea kwetu. Ina maana kwa kutofanya yale tupendayo tukihofia kutofanikiwa tunajifungia milango ya kuendelea kwenye maisha yetu na hilo linafanya wengi wasiopenda kujaribu ama wanaoshindwa kujaribu kwa kuhofia majibu mabaya ya "what if?' kushindwa kutimiza ndoto zao kwa kufanya kazi wasizo na mwito nazo, jambo linalowafanya wakose ubunifu unaostahili na kisha kuifanya kazi kutokuwa ya furaha kama ambavyo ingestahili. Hili linayafanya matokeo ya kazi kutokuwa katika kiwango kinachotakiwa na kusababisha jamii kutopata "matunda" halisi ya kazi hizo. Kakangu ALBERT KISSIMA aliwahi kuuliza SWALI HILI na sina uhakika ni wangapi waliweza ama wangeweza KULIWAZA KWA U-CHANYA wake? Aliweka Chemsha Bongo HAPA akiuliza "Utachukua uamuzi gani pale mlinzi wako wa usiku anapokusimulia ndoto aliyoota usiku wa leo na anakutaka uahirishe safari yako kwani safari yako kulingana na ndoto yake inaonyesha basi utakalosafiria litapata ajali na watu wote watapoteza maisha? Fikiria kuwa umeahirisha safari na kweli ajali ikatokea,kwa maana kuwa ameokoa maisha yako. Utamfukuza kazi au utaendelea kuwa naye?"
Natambua kuwa jamii ingenufaika kama kila mtu angeweza kufanya kile apendacho na ni rahisi kufanya hivyo tukiacha kukatishana tamaa kwa kutilia mkazo na kuulizana "matokeo hasi" (negative results) za kile tutakacho kufanya. Mtambuzi Shabani Kaluse aliwahi kuzungumzia juu ya hofu ya kesho kuwa kama dubwana la kutisha (irejee hapa)
Sasa naamini twatambua kuwa kuna maswali ya kujiuliza katika harakati zetu za kuikwamua jamii, na swali langu ni "what if we 'what ifs' positively"? Nadhani itasaidia kuwafanya watu waamini katika ndoto zao na kufanikisha mengi kwenye jamii.
Ni mtazamo tu BINAFSI kwani kwa niaminivyo mimi, BINADAMU WOTE NI WABINAFSI. Ndivyo ninavyoamini mimi na ninaweza kukudhihirishia hili. Mbinafsi wa kwanza ni mimi ambaye kwa u-binafsi wangu naamini sote tutakuwa sawa iwapo tutahesabika kuwa sote tu wabinafsi (faida kwangu), na m-binafsi wa pili ni yule ambaye kutokana na kutaka kuwa bora kuliko baadhi yetu, atakuwa m-binafsi kupinga kuwa si sote tulio wabinafsi kwa kuwa haamini kuwa yeye ni kama sisi. Yaani yeye ni tofauti. (faida kwake). Hivi what if we what ifs positively kuhusu ubinafsi wangu na wako?
Tuonane "Next Ijayo"

Nionavyo u-CHANYA wa HASI yao

Inarudiwa kwa kuwa inatakiwa kuendeleza ijayo juu yake. Na pia Yaeleweka vema ikiangaliwa kwa "jicho la ndani"
Image from The Summit Blog
Bado naendelea kuamini kuwa suala la UBAYA na UZURI wa kitu ni tafsiri itokanayo na uhusianishaji wa kilichotendeka sasa na mfululizo wa kilichotokea ama kitakachotokea. Kwa maana nyingine ni kuwa bado naamini katika kile nilichoandika Septemba 14, 2009 kuwa Hakuna kibaya kisicho na uzuri...... Yategemea umeachia wapi kuoanisha na tukio (irejee hapa). Na hili laendelea kujidhihirisha maishani mwangu.
Labda niseme kuwa maisha tuishiyo binadamu wengi ni tofauti saana tuwapo na raha na pale tuwapo na hofu. Umeshawahi kuwa kwenye chombo cha usafiri halafu ukatikea mtikisiko ambao unaashiria mwongozaji kupoteza uwezo wa kumili chombo? Utasikia sala zisemwazo na MUNGU aitwavyo. Ni kwa kuwa tukiwa "wahitaji" twafikiria mbaali zaidi ya tufanyavyo tukiwa na "raha". Na katika maisha ni vivyo hivyo. Wapo walio makini kuwaza mpaka tukio lilipoishia na si uwezekano wa ambacho kingetokea kama kile kilichotokea kisingetokea wakati ule.
Na kibaya zaidi ni kuwa wanawaza katika UPANDE HASI PEKEE bila kuwaza CHANYA ya kile kutokea wakati huo. Niliwahi kumsikia mfanyakazi mwenzangu akisema anatamani asingepewa ruhusa alipoomba (akidanganya) kwenda kumpokea mwanawe ilhali alikuwa anaenda kwa mpenziwe na kisha akafumaniwa. Nilisikitika kuwa amefikia kiwango cha KUTAMANI ANGENYIMWA RUHUSA lakini ninaloamini ni kuwa angenyimwa, basi angekasirika na angelichukulia hilo kama jambo HASI (negative) kwake. Na kama angeishia hapo (aliponyimwa ruhusa) asingeona u-CHANYA wa kunyimwa ruhusa huko ambako ndio kungekuwa kumuepusha na fumanizi.
Miezi kadhaa iliyopita nilikamatwa na askari kwa kuzidisha mwendokasi. Ilikuwa ni mwendokasi ambao hata sikujua kuwa nilikuwa niko zaidi ya kiwango kitakiwacho kwa kuwa nilikuwa nikiwaza mengi yaliyochukua umakini wangu. Lakini ukweli ni kuwa nilikuwa ninaendesha 84mph katika sehemu inayostahili 55mph. Niliposimamishwa na askari nilishukuru. Na licha ya adhabu iliyokuwa mbele yangu, nilifikiria ni nini kingetokea kama (kwa kupoteza umakini nilikokuwa nipoteza) ningeenda nje ya njia na kugonga nguzo, ama gari nyingine, ama kupata ajali ya aina yoyote? Je nisingetamani kama ningekuwa nimekamatwa na kulipa faini kubwa (ambayo haitafanana kwa vyovyote na kugonga gari ama nguzo)?
Hebu fikiria kama mkianza safari kisha tairi ikachomoka utawaza nini? Wengine husema huo ni mkosi japo nafikiri ni afadhali ya hilo kuliko tairi kuchomoka wakati mmeshafika mbali na mkiwa kwenye mwendo kasi mkubwa.
Eti watu wakioana na kuachana ndani ya muda mfupi wapo wanaouona huo kama mkosi japo (licha ya kutopenda kuvunjika kwa ndoa yoyote) naamini ni heri hiyo kuliko kama wanandoa wanaishi miaka 20, wanazaa watoto pamoja kisha wanatalakiana na kuacha watoto wakiteseka wakiwa hawajajengewa msingi imara wa maisha.

Kwani ni kipi ambacho kinatokea kikiwa na u-HASI na ambacho hakina u-hasi zaidi? Na kuna haja gani ya kung'ang'ania u-hasi ilhali kuna uwezekano wa kushikilia u-chanya ambao (hata kama hautupi matokeo ya papo kwa hapo) yanatuwezesha kuwa na "moyo" wa tumaini (ambalo wakati mwingine twauhitaji) ili kuweza kusonga?
Na kuna haja gani ya kung'ang'ania ambacho hakionekani kuwa na suluhisho na hata mtazamo utakaopunguza aina yoyote ya uwezekano wa kupata suluhisho

Ni kwa kujiuliza haya, najitahidi kuwa na mtazamo chanya na hivi ndivyo Nionavyo u-CHANYA wa HASI yao.